صوبہ سندھ کے ضلع لاڑکانہ میں نایاب نسل کی نابینا ڈولفن دادو کینال میں پھنس گئی ہے۔

محکمہ وائلڈ لائف کے مطابق خوراک کی تلاش میں دریا سے بھٹک کر کینال میں پھنسی ڈولفن کو نکالنے کے لیے ریسکیو آپریشن شروع کردیا ہے۔

وائلڈ لائف کے حکام کا کہنا ہے کہ 35 اہلکاروں اور 20 تیراکوں پر مشتمل ٹیم کے ہمراہ دادو کینال میں ریسکیو آپریشن کیا جارہا ہے۔

حکام نے بتایا کہ ریسکیو آپریشن میں ڈبلیو ڈبلیو ایف انٹر نیشنل کی عظمیٰ خان بھی شرکت کررہی ہیں۔

وائلڈ لائف کے حکام کا مزید کہنا ہے کہ ریسکیو کی جانے والی ڈولفن کو سیٹلائیٹ ٹیگ لگا کر دریائے سندھ میں چھوڑا جائے گا۔

متعلقہ خبر: کراچی: 27 ڈولفنز کو بچانے کیلئے سندھ وائلڈ لائف کا بڑا آپریشن

 واضح رہے کہ کراچی میں خطرے سے دوچار 27 انڈس بلائنڈ ڈولفنز کو بچانے کے لیے پہیے حرکت میں ہیں جو 10 مختلف پانی کی نہروں میں پھنسے ہوئے ہیں۔

ریسکیو پلان کے مطابق ایک ماہ تک جاری رہنے والے ریسکیو آپریشن میں 30 سے زائد افراد حصہ لیں گے۔

آپریشن سندھ وائلڈ لائف ڈپارٹمنٹ (ایس ڈبلیو ڈی) اور اس کے حکام کی ٹیموں کے ذریعے شروع کیا جائے گا جو میٹھے پانی کی ڈولفن کو محفوظ طریقے سے بچانے میں درپیش چیلنجز سے بخوبی آگاہ ہیں، تاہم وہ پراعتماد دکھائی دیتے ہیں کہ وہ اس کام کو پورا کر سکیں گے۔

ایس ڈبلیو ڈی کے چیف کنزرویٹر جاوید احمد مہر نے کہا کہ یہ ایک بہت بڑا اور بے مثال آپریشن ہے، تمام ڈولفنز کو بغیر کسی نقصان کے بچانے کے لیے تیار ہیں۔

پھنسے ہوئے ڈولفن

سکھر انڈس ڈولفن سینکچری کے اعداد و شمار کے مطابق مختلف مقامات پر کم از کم 27 ڈولفن دیکھی گئی ہیں۔

رپورٹ کے مطابق دادو کینال میں 3، میرواہ کینال میں 3، کیرتھر کینال میں 4، روہڑی کینال میں 6، نارا کینال میں 3، پٹ فیڈر میں 2، گھوٹکی فیڈر میں 4 اور ابوالواہ خیرپور میں 2 ڈولفن دیکھی گئی ہیں۔