خیبرپختونخوا فوڈ سیفٹی اتھارٹی کی جانب سے پشاور میں بڑی کارروائی کی گئی ہے۔

تفصیلات کے مطابق کارروائی پچگی روڈ پر خفیہ اطلاع پر گھر کے اندر جعلی گڑ تیار کرنے والا یونٹ کے خلاف کی گئی جبکہ کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا ہے۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔

واضح رہے کہ   مضر صحت گڑ تیار کرنے پر مالک کو گرفتار کرکے مقدمہ درج کرلیا گیا ہے۔

یاد رہے کہ کچھ ماہ قبل ہی خیبرپختونخوا فوڈ سیفٹی اتھارٹی کی جانب سے جعلی پتی بنانے والوں کے خلاف بھی کامیاب کارروائی کی گئی تھی۔

 کارروائی کے نتیجے میں فیکٹری سے ایک ہزار کلو سے زائد جعلی چائے کی پتی برآمد کرلی گئی تھی جبکہ جعلی پتی کی تیاری میں گڑ، سوڈا، مضر صحت رنگ اور استعمال شدہ چائے کی پتی استعمال کی جارہی تھی۔

 فوڈ سیفٹی اتھارٹی حکام کا کہنا تھا کہ چائے کی پتی کو نہایت ہی گندے فرش پر سوکھنے کے لیے رکھا گیا تھا جبکہ مضر صحت چائے کی پتی کو پشاور کے مختلف علاقوں میں سپلائی کیا جاتا تھا۔