ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے کہا ہے کہ ملک کو لوٹ کر کھانے والے معیشت پر بھاشن دے رہے ہیں۔

ڈاکٹر شہباز گِل نے مریم اورنگزیب کے بیان پر ردِ عمل دیتے ہوئے کہا کہ درباری ملک سے فرار آقاؤں کے حکم پر منفی سیاست میں مصروف ہیں، ن لیگ کی آدھی قیادت مفرور اور آدھی سائلنٹ ہے۔

ان کا کہنا تھا کہ ن لیگ کا اپنا کورم ادھورا قیادت ناپید ہے، نااہل درباریوں اور آقاؤں کی ذاتی معیشت دگر گوں ہے، ملک کو لوٹ کو کھانے والے معیشت پر بھاشن دے رہے ہیں۔

ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے مزید کہا کہ ملک کو تاریخی خسارے میں چھوڑنے والے عوام کی غربت کے اصل ذمہ دار ہیں۔

واضح رہے کہ پاکستان مسلم لیگ ن کی ترجمان مریم اورنگزیب نے قومی اسمبلی اجلاس کا کورم پورا نہ ہونے پر ردِ عمل دیتے ہوئے کہا تھا کہ جب عوام مہنگائی کی چکی میں پسے گی تو انکا اپنا کورم پورا نہیں ہوگا۔

مریم اورنگزیب نے کہا تھا کہ انکے اپنے اراکین اس عوام دشمن بجٹ کا حصہ بننا نہیں چاہتے، اپوزیشن تقرریں کر رہی ہے اور انکی فرنٹ لائن خالی ہے، جو وزیر اٹھتا ہے گالی دینے اور تنقید اور الزام دینے کے لئے اٹھتا ہے۔

مریم اورنگزیب نے کہا تھا کہ ساڑھے تین چار سال ہوگئے آپ بتائیں کیا کیا ہے؟ چار سال میں مہنگائی، بے روز گاری اور قرضوں میں اضافہ ہوگیا ہے۔

پاکستان مسلم لیگ ن کی ترجمان مریم اورنگزیب کا مزید کہنا تھا کہ پچھلی حکومت پر الزام دینے کے علاوہ کیا کیا؟ مہنگائی کا طوفان لے آئے ہیں اس لئے اس بجٹ کا کوئی حصہ نہیں بننا چاہتا، وہ جو کورم پورا نہیں کرسکتے وہ بجٹ کیا پاس کریں گے۔