پاکستان سے بیرون ملک جاتے ہوئے 10 ہزار ڈالرز یا اُس کے برابر کوئی بھی غیر ملکی کرنسی لے جائی جاسکتی ہے۔

پاکستانی قانون کے مطابق بیرون ملک جانے والے پاکستانی کرنسی میں 10 ہزار روپے سے زائد کی رقم اپنے ساتھ نہیں لے جاسکتے ۔

بھارت جانے والے 3 ہزار پاکستانی روپوں سے زائد کی کرنسی بھی نہیں لے جاسکتے۔

واضح رہے کہ متنازع ٹک ٹاک اسٹار حریم شاہ کیخلاف منی لانڈرنگ اور ملک سے پاؤنڈز باہر منتقلی کے الزام میں انکوائری شروع کر دی گئی ہے۔

حریم شاہ نے ایک حالیہ ویڈیو میں غیر قانونی طور پر غیر ملکی کرنسی ملک سے باہر منتقل کرنے کا اعتراف کیا ہے، وہ قطر ایئرویز کے ذریعے کراچی کے جناح انٹرنیشنل ایئرپورٹ سے برطانیہ پاونڈز لے کر گئی ہیں۔

ٹک ٹاک اسٹار نے لاکھوں برطانوی پاؤنڈز کے بنڈل دکھائے جن کے بارے میں دعویٰ کیا ہے کہ وہ پاکستان سے لائی ہیں۔

Hareem Shah reaches London pic.twitter.com/aehGbDLGJC

— Murtaza Ali Shah (@MurtazaViews) January 12, 2022

انہوں نے ایئرپورٹ پر اپنا اثر و رسوخ استعمال کیا جہاں کسی کو کوئی پرواہ نہیں تھی۔

حریم شاہ کی اس ویڈیو کے بعد حکومت اور سیکیورٹی اداروں کی کارکردگی پر سوال کھڑے ہوگئے ہیں۔

حریم شاہ کا  کہنا ہے کہ پاکستانی پیسے کی کوئی حیثیت نہیں، ملک سے باہر پیسے لاتے وقت خیال رکھیں قانونی ادارے پکڑ لیتے ہیں۔

انہوں نے کہا کہ پیسے ملک سے باہر لاتے ہوئے مجھے کسی نے کچھ نہیں کہا اور نہ کہہ سکتے ہیں ،پاکستان میں جو قانون ہے وہ غریب کو زیادہ پکڑتا ہے۔

ذرائع کے مطابق ڈائریکٹر ایف آئی اے کراچی عامر فاروقی نے انکوائری کا حکم نامہ جاری کردیا۔

ذرائع کا کہنا ہے کہ یہ انکوائری ڈپٹی ڈائریکٹر امیگریشن رابعہ قریشی کریں گی۔

 اس کے علاوہ بین الاقوامی سرحدوں پر کرنسی کی اسمگلنگ کی روک تھام کے لئے ذمہ دار کسٹمز اہلکار سے بھی تفتیش کی جائے گی۔

واضح رہے کہ حریم شاہ کا اصل نام فضا حسین ہے جو کہ 10 جنوری کو امریکہ روانہ ہوئی تھیں۔