مریم اورنگزیب نے کہا ہے کہ آج بیک وقت عوام کا معاشی اور پارلیمان کا آئینی قتل ہوگا۔

 ‎ پاکستان مسلم لیگ (ن) کی ترجمان مریم اورنگزیب نے کہا ہے کہ عمران خان آئی ایم ایف کی غلامی میں آج پارلیمان اورعوام کا قتل کرنے جارہا ہے۔

انہوں نے کہا کہ پارلیمانی عمل بلڈوز کرکے دو آرڈیننس، اور 25 بل منظور کرانے پر آج کے دن کو یوم سیاہ کے طورپر یاد رکھا جائے گا ، عمران صاحب آج کی قانون سازی سے اپنی لوٹ مار، اے ٹی ایمز، مافیاز اور کارٹلز کو این آر او دیں گے۔

مریم اورنگزیب نے کہا ہے کہ عمران صاحب ایگزیکٹو آرڈر کے ذریعے ججوں کی تقرری کا اختیار اپنے پاس لے کر قانون اور آئین کی تضحیک کر رہے ہیں ، عمران صاحب آج طاقت ور چوروں کو لوٹ مار پہ این آر او اور عوام کو مزید لوٹنے کا لائسنس دیں گے۔

پاکستان مسلم لیگ (ن) کی ترجمان نے کہا ہے کہ عمران صاحب آج جمہوریت، آئین اور قانون کے قتل کی تاریخ رقم کریں گے ، فسطائیت کا بلڈزور چلا کرعمران صاحب قوم پر منی بجٹ مسلط کریں گے ، ساڑھے تین سال میں ایک قانون سازی بھی عمران صاحب اتفاق رائے سے نہ کراسکے۔

انہوں نے کہا کہ آج پاکستان کا برانڈ بھیک، آئی ایم ایف کی غلامی، مہنگائی اور معاشی تباہی ہے ، پارلیمان کے جنگلے گرانے والے آج پارلیمان کے جمہوری عمل ، قاعدے قانون کو روند رہے ہیں ، پاکستان میں آج تاریخ کا مہنگا ترین بجٹ مسلط کیاجائے گا۔

مریم اورنگزیب نے کہا ہے کہ عمران صاحب کے وعدہ کے مطابق آج پارلیمان کے ذریعے قوم کو رلانے کا بندوبست کیا جا رہا ہے ،  آج کے بعد عوام اب صرف ایک خودکشی کی منتظر ہے۔

‎

‎