سندھ ہائی کورٹ نے ایس بی سی اے افسران کو حکم دیا کہ مکہ ٹیرس کا غیرقانونی حصہ ایک ماہ کے اندرگرایا جائے۔

سندھ ہائی کورٹ مکہ ٹیرس سے متعلق کیس کی سماعت ہوئی۔

جسٹس حسن اظہررضوی نے کیس کی سماعت کے دوران ریمارکس دیے کہ شہروں میں ہی مکینوں کو مہاجر بنا دیا گیا ہے۔ کروڑوں روپے کے فلیٹس خریدنے والے آج سٹرکوں پر آگئے۔ ان سے پوچھیں جنہوں نے زندگی بھرکی جمع پونچی لگائی۔

دورانِ سماعت غلط بیانی کرنے پرعدالت نے بلڈرکو جھاڑ پلا دی اور استفسار کیا کہ ایک فلیٹ کی کتنی قیمت ہے؟

بلڈرمحمد وسیم نے عدالت میں بیان دیا کہ بیس لاکھ روپے قیمت ہے ایک فلیٹ کی جس پر جسٹس سید حسن اظہررضوی برہم ہوئے اور کہا کہ داڑھی رکھ کر جھوٹ بولتے ہو؟ ایسا ہے تو ناظرکے ذریعے پوری بلڈنگ خرید لیتے ہیں۔

اظہارِبرہمی کرتے ہوئے عدالت نے کہا کہ ایسا بیان مت دو۔ صدر میں ایک پورشن بیس لاکھ کا؟ کیا کہہ رہے ہو؟ ایک کروڑسے سوا کروڑ کا فلیٹ ہوگا۔ بیس لاکھ روپے میں تو سپر ہائے پر پلاٹ نہیں ملتا۔

جسٹس حسن اظہر رضوی نے کہا ہم نہیں چاہتے کہ مکینوں کو نقصان ہو۔ کسی سے زیادتی نہیں ہونے دیں گے۔ ہم صرف چاہتے ہیں غیر قانونی حصہ گرایا جائے۔

عدالت کا ایس بی سی اے افسران سے مکالمہ

عدالت نے ایس بی سی اے کے افسران سے پوچھا کہ کیا عمارت پر کارروائی کا طریقہ کار محفوظ ہے؟

ایس بی سی اے افسران نے عدالت کو بتایا کہ محفوظ طریقے کار کے تحت کارروائی کر رہے ہیں۔

عدالت نے ریمارکس دیے کہ ایمانداری سے کام کریں، کسی سے زیادتی نہ ہو۔ نقصان دوسروں کو پہنچاؤ گے تو خود بھگتو گے۔ اللہ کی لاٹھی بے آواز ہے۔

سندھ ہائی کورٹ نے کہا کہ عمارت کا حصہ ایسے توڑا جائے کہ پوری عمارت متاثر نہ ہو

دورانِ سماعت عدالت نے ایس بی سی اے افسران پر اظہارِ برہمی کرتے ہوئے کہا کہ آپ کے افسران نے آنکھیں بند کررکھی تھیں۔ کیا اپنے افسران کے خلاف ایف آئی آر درج کروائی؟ آپ کے پاس اچھے افسران ہیں نہ مشینری ہے۔ نسلہ ٹاور کے لیے کمشنر مشینری تلاش کرتا رہا۔

سندھ ہائیکورٹ نے بلڈر کو یہ بھی حکم دیا کہ چھ ماہ تک بلڈر فلیٹس کی تزین وآرائش کرے گا۔ عمارت بحالی کے بعد بلڈرایس بی سی اے  سے رجوع کرے۔

عدالت نے ایس بی سی اے افسران سے ایک ماہ میں پیش رفت رپورٹ طلب کرتے ہوئے حکم دیا کہ ایس بی سی اے جائزہ لے کردوبارہ بلڈنگ اپروول پلان منظور کرے۔

سندھ ہائیکورٹ نے مکہ ٹیرس کیس کی سماعت ایک ماہ کے لیے ملتوی کردی