سردار علی شاہ نے کہا ہے کہ ایران اور سندھ کے مابین قدیم تاریخی و ثقافتی تعلقات رہے ہیں۔

وزیرتعلیم سندھ سید سردار علی شاہ نے کراچی میں تعینات ایرانی قونصل جنرل حسن نورین سے اپنے آفیس میں ملاقات کی جس میں دونوں رہنماؤں نے سندھ اور ایران کے مابین مختلف شعبہ جات میں ملکر کام کرنے کے مواقع پر تفصیلی تبادلہ خیال کیا۔

اس موقع پر ایرانی قونصل جنرل حسن نورین نے وزیر تعلیم و ثقافت سید سردار علی شاہ کو ایران کے دارالحکومت تہران میں  منعقدہ ہونے والے عالمی سیاحتی نمائش میں شرکت کرنے کی دعوت دی جوکہ وزیر ثقافت سید سردار علی شاہ نے کھلے دل سے قبول کی۔

ملاقات میں وزیر تعلیم و ثقافت سید سردار علی شاہ نے کہا کہ ایران اور سندھ کے مابین کلچرل ایکسچینج پروگرام ہونے چاہیں اور سندھ کے فنکار ایران میں جبکہ ایرانی فنکار سندھ میں پرفارم کریں جنکو متعلقہ محکموں کی طرف سے تمام تعاون فراہم کیا جائے۔

انہوں نے ایرانی قونصل جنرل کو بتایا کہ سندھ کے محکمہ ثقافت نے حال ہی میں شاہ عبداللطیف بھٹائی کی شاعری کا فارسی میں ترجمہ شایع کروایا ہے جس پر ایرانی قونصل جنرل نے تعجب اور خوشی کا اظہار کیا۔

وزیر تعلیم و ثقافت سید سردار علی شاہ نے کہا ہے کہ ایران اور سندھ کے مابین قدیم تاریخی و ثقافتی تعلقات رہے ہیں اورفارسی 800 سال تک سندھ کی سرکاری زبان رہی ہے۔

بعدازاں وزیر ثقافت سید سردار علی شاہ نے انکو شاہ عبداللطیف بھٹائی کا فارسی ترجمہ پیش کیا تو ایرانی قونصل جنرل حسن نورین نے بھٹائی کی شاعری اپنی فارسی زبان میں پڑھ کر خوشی کا اظہار کیا۔

ایرانی قونصل جنرل حسن نورین نے کہا کہ فارسی ترجمہ پڑھ کر ایرانی ادیب و شعراء کو سندھ کو بہتر طور پر سمجھنے میں آسانی ہوگی اور اسی طرح عوامی سطح پر دوطرفہ تعلقات کو فروغ ملے گا، سندھ کے سیاحتی وفود کو ہم دل سے خوش آمدید کرینگے۔

ملاقات میں سیکریٹری ثقافت عبدالرحیم سومرو اور ایرانی اکانامک اتاشی ہادی گلریز بھی شریک تھے، ملاقات کے اختتام پر وزیر ثقافت سید سردار علی شاہ نے ایرانی وفد کو اجرک و کتب کے تحائف پیش کیے۔