پی ٹی آئی کے رہنما جہانگیر خان ترین نے بہاولپور حادثے پر اظہارِ افسوس کیا ہے۔

جہانگیر ترین نے اڈا مسافر خانہ، احمد پور شرقیہ کے قریب ٹریلر کی رکشہ کو ٹکر سے 4 بچوں کے جاں بحق ہونے کے واقعے  پر دکھ اور افسوس کا اظہار کیا ہے۔

جہانگیر ترین نے جاں بحق بچوں کے لواحقین سے دلی ہمدردی و اظہار تعزیت کیا، ان کا کہنا تھا کہ حادثے میں زخمیوں کی جلد صحت یابی کیلئے دعا گو ہوں۔

واضح رہے کہ بہاولپور میں نواحی علاقہ مسافر خانہ کے قریب ٹریکٹر ٹرالی اور رکشے میں تصادم ہوا ہے۔

تیز رفتار ٹریکٹر ٹرالی بچوں سے بھرے چنگچی رکشے سے جا ٹکرائی جس کے نتیجے میں 4 بچے جاں بحق اور 10 افراد زخمی ہوگئے، زخمیوں کو اسپتال منتقل کردیا گیا ہے۔

وزیر اعلیٰ پنجاب سردار عثمان بزدار نے اذا مسافر خانہ، احمد پور شرقیہ کے قریب ٹریلر کی رکشہ کو ٹکر سے 4 بچوں کے جاں بحق ہونے کے واقعے پر دکھ اور افسوس کا اظہار کیا ہے۔

وزیراعلیٰ عثمان بزدار نے جاں بحق بچوں کے لواحقین سے دلی ہمدردی و تعزیت کا بھی اظہار کیا ہے۔

عثمان بزدار نے افسوسناک واقعے کے بارے میں کمشنر بہاولپور اور آر پی او بہاولپور سے رپورٹ طلب کر لی اور حادثے کے ذمہ دار ڈرائیور کے خلاف قانونی کارروائی کا حکم بھی دے دیا ہے۔

وزیراعلیٰ پنجاب نے کہا کہ حادثے کے ذمہ دار ڈرائیور کو قانون کی گرفت میں لا کر مزید کارروائی کی جائے اور زخمیوں کو علاج معالجے کی بہترین سہولتیں فراہم کی جائیں۔

وزیراعلیٰ عثمان بزدار نے انتظامیہ کو اسپتال پہنچ کر زخمیوں کے علاج معالجے کی خود نگرانی کی ہدایت دی ہے۔