فوادچوہدری کا کہنا ہےکہ آمدن کم اوراخراجات زیادہ ہوں تو مہنگائی زیادہ لگتی ہے۔

وفاقی وزیر اطلاعات ونشریات فواد چوہدری نے لاہورمیں پریس کانفرنس کرتے ہوئے کہاکہ صحت کارڈ کا سب سے زیادہ فائدہ سفید پوش اور مڈل کلاس طبقے کو ہو گا، امیر لوگ علاج کیلئےبیرون ملک چلےجاتے ہیں، غریبوں کووہی سہولتیں دےرہےہیں جوامیروں کیلئے ہیں۔

انہوں نے کہاکہ سب سے زیادہ مشکل میں تنخواہ دار طبقہ ہے جن کی تنخواہیں نہیں بڑھائی جاتیں، آمدن کم اور اخراجات زیادہ ہوں تو مہنگائی زیادہ لگتی ہے۔

انہوں نے کہاکہ پرائیویٹ سیکٹرکےآگے آنےتک مسائل حل نہیں ہوسکتے، پرائیویٹ سیکٹرہیلتھ میں سرمایہ کاری کرناچاہتاہے، عوام کواچھےعلاج سےغرض ہے،صحت کارڈ کےذریعےصحافیوں کابھی مفت علاج ہوگا۔

وفاقی وزیراطلاعات فوادچوہدری نے کہاکہ صحت کارڈ کے ذریعے 10 لاکھ تک کامفت علاج ہوگا، سندھ حکومت کو بھی صحت کارڈ میں حصہ ڈالنا چاہئے۔

وفاقی وزیر نے کہا کہ صحت کارڈ سے شعبہ صحت میں سرمایہ کاری کو بھی فروغ ملے گا، پروگرام میں نجی شعبے کو بھی شامل کیا گیا ہے۔ صحت کارڈ سے نجی ہسپتالوں میں بھی علاج ہو سکے گا جہاں ہونیوالے اخراجات خرچ حکومت برداشت کرے گی۔

انہوں نے کہا کہ چند لوگوں کا خیال ہے مہنگائی سے عمران خان کی مقبولیت متاثر ہوئی، صرف تحریک انصاف ہی ایسی جماعت ہے جو پورے ملک کی نمائندگی کرتی ہے، مسلم لیگ ن سینٹرل پنجاب جبکہ پیپلز پارٹی سندھ تک محدود ہے۔

فوادچوہدری نے مزید کہاکہ حماد اظہر اور پرویز خٹک کے درمیان کوئی بحث نہیں ہوئی، حماد اظہر تو چاہیں گے ہر جگہ گیس ملے، گیس اسکیموں کو مکمل کرنے کیلئے ہر سال 90 ارب روپے چاہئیں، اگلے 5 سال بھی پی ٹی آئی کی حکومت ہوگی۔

ان کا کہنا تھا کہ پیپلزپارٹی گئی تو گیس پر گردشی قرضہ نہیں تھا،ن لیگ نے 157 ارب کاگردشی قرضہ چھوڑا۔

انہوں نے کہاکہ عمران خان کے علاوہ کوئی قومی لیڈر نہیں ہے، پاکستان کامستقبل روشن ہے، الیکشن آنے دیں میدان بھی ہوگا اور گھوڑا بھی،ہم آپ کو دکھائیں گے کہ الیکشن کیسے لڑتے ہیں، پی ٹی آئی واحدجماعت ہےجوپورےملک سےامیدوارکھڑےکرسکتی ہے۔