پاکستان نے سلامتی کونسل میں مستقل رکنیت کے لئے بھارتی اہلیت  پر سوالات اٹھا دئیے۔

 سلامتی کونسل اصلاحاتی عمل پر جنرل اسمبلی میں  مباحثہ سے خطاب کرتے ہوئے اقوام متحدہ میں متعین پاکستا ن کے مستقل مندوب منیر اکرم کا کہنا تھا کہ سلامتی کونسل کی قراردادوںکی کھلی خلاف ورزی کرنے والا ملک غیر مستقل رکن بننے کا بھی اہل نہیں۔

منیر اکرم کا کہنا تھا کہ جو ملک طاقت کے زور پر مغلوب عوام کے حقوق صلب کرے وہ کیسے عالمی امن کا ضامن ہو سکتا ہے۔

اقوام متحدہ کی جنرل اسمبلی میں اظہارخیال کرتے ہوئے کہاکہ بھارت کئی عشروں پرانے تنازعہ کشمیرکے حل کے لئے پندرہ رکنی عالمی ادارے کی قراردادوں کی کھلی خلاف ورزیاں کررہا ہے۔

انہوں نے کہا کہ بھارت نے گزشتہ سو سے زائدروز سے مقبوضہ کشمیرکے اَسی لاکھ عوام کا مکمل محاصرہ کرکے وہاں کرفیو نافذ کررکھا ہے اوروہ وادی کشمیرکے عوام اوراپنی ہی اقلیتوںکے خلاف بڑے پیمانے پرانسانی حقو ق کی خلاف ورزیاں کررہا ہے۔

 منیر اکرم نے واضح کیا کہ سلامتی کونسل میں طاقت کی بجائے ملکی امن کے لئے ان کی کوششوں کو دیکھنا چاہیئے۔ ان کا کہنا تھا کہ اصلاحات پر پاکستانی مئوقف جمہوری اصولوں اور  عصر حاضر  کے تقاضوں سے ہم آہنگ ہے۔

واضح رہے کہ یہ پہلا موقع ہے جب پاکستان نے سلامتی کونسل کی رکنیت کے لئے ہندوستان کی اہلیت کو چیلنج کیا ہے۔