پاکستان قومی کرکٹ ٹیم کے سابق کپتان اور آل راؤنڈر پروفیسر محمد حفیظ نے کہا کہ رٹائرمنٹ کے بعد ساری توجہ اب لیگ کرکٹ پر ہے۔

پاکستان کے تجربہ کار آل راؤنڈر نے لاہور میں میڈیا سے باتیں کرتے ہوئے کہا کہ عمان کی کرکٹ لیگ میں حصہ لوں گا اور وہاں دو میچز کھیلنے کے بعد پی ایس ایل کھیلوں گا۔

سابق بیٹر نے کہا میری ساری توجہ اب صرف لیگ کرکٹ پر مرکوز ہے اور میں اپنی فارم اور فٹنس کو برقرار رکھنے کے لئے کافی محنت کر رہا ہوں۔

سابق کپتان کا کہنا تھا ٹیم کی قیادت کرنا آسان نہیں ہے اور ایک اچھا قائد بننے میں وقت درکار ہوتا ہے، شاہین شاہ کو لاہور قلندر کا کپتان بنانے پر محمد حفیظ نے کہا کہ وہ ایک ذہین اور سمجھدار کرکٹر ہے اور وہ ایک اچھا کپتان بن سکتا ہے۔

پی ایس ایل کے حوالے سے ان کا کہنا تھا کہ تمام ٹیموں نے اچھے کھلاڑیوں کا انتخاب کیا ہے ، لاہور قلندر کے پاس کوالٹی پیسرز اور بیٹر ہیں۔

سابق کپتان نے مزید کہا کہ پی ایس ایل میں فیلڈنگ کے شعبے میں کام کرنے کی ضرورت ہے اور ٹی ٹوئنٹی میں اچھی فیلڈنگ سے جیت کے امکانات زیادہ ہوتے ہیں۔

محمد حفیظ نے کہا کہ کورونا کی وجہ سے اب کھیل کے میدان بند نہ ہوں تو بہتر ہے کیونکہ کھلاڑیوں سمیت منتظمین کووڈ صورتحال سے بخوبی واقف ہو چکے ہیں ، پی سی بی کی اچھی حکمت عملی پی ایس ایل کو کامیاب بنا دے گی۔