پیٹرولیم مصنوعات کی قیمتوں سے متعلق انتہائی اہم خبر آگئی،‏پیٹرولیم مصنوعات پر سیلز ٹیکس کا نوٹیفکیشن جاری کر دیا گیا ہے۔

نوٹیفکیشن کے مطابق پیٹرول پر 2.5 فیصد سیلز ٹیکس عائد ہوگا اور سیلز ٹیکس نوٹیفکیشن کے تحت قیمتیں 31 جنوری تک مستحکم رہیں گی۔

نوٹیفکیشن میں کہا گیا ہے کہ ہائی اسپیڈ ڈیزل 5.44 فیصد سیلز ٹیکس عائد ہوگا۔

نوٹیفکیشن میں مزید کہا گیا ہے کہ لائٹ ڈیزل پر 2.7 فیصد سیلز ٹیکس عائد ہوگا جبکہ مٹی کے تیل پر 8.3 فیصد سیلز ٹیکس عائد ہوگا۔

یاد رہے اس سے قبل وزارت خزانہ کے مطابق پٹرول کی قیمت میں 3روپےایک پیسےفی لیٹراضافے کا اعلان کیا گیا ہے جس کے بعد پٹرول کی نئی قیمت 147روپے 83پیسے ہوگئی ہے۔

واضح رہے کہ رواں مالی سال کے پہلے 6 ماہ کے دوران پیٹرولیم مصنوعات کی درآمدات میں 113 فیصد اضافہ دیکھا گیا ہے۔

وفاقی ادارہ شماریات کے اعداد و شمار کے مطابق رواں مالی سال کی پہلی ششماہی (جولائی تا دسمبر) کے دوران 10 ارب 18 کروڑ ڈالر کی پیٹرولیم مصنوعات درآمد کی گئیں۔

اعداد و شمار کے مطابق گزشتہ مالی سال کی پہلی ششماہی کے دوران 4 ارب 77 کروڑ ڈالر کی پیٹرولیم مصنوعات درآمد کی گئی تھیں۔

اس طرح رواں مالی سال کی پہلی ششماہی میں پیٹرولیم مصنوعات کی درآمدات کا حجم گزشتہ مالی سال کے اسی دورانیے کے مقابلے میں 113 فیصد زیادہ رہا۔