لاہور: پی سی بی اور ضلعی انتظامیہ نے کورونا ویکسین کے بغیر آنے والوں تماشائیوں کو موقع پر ہی ویکسین لگانے کا فیصلہ کیا ہے۔

ذرائع کے مطابق پی سی بی اور ضلعی انتظامیہ کے مابین ہونے والی میٹنگ میں اہم فیصلے کیے گئے ہیں جبکہ کورونا ویکسین کے بغیر آنے والوں کو موقع پر ہی ویکسی نیشن کرنے کا فیصلہ کیا گیا ہے۔

ذرائع کے مطابق ایسے تماشائیوں کو موقع پر ہی ایک ڈوز لگائی جائے گی جبکہ ڈپٹی کمشنر لاہور آفس سے کورونا ویکسین کی بڑی کھیپ قذافی اسٹیڈیم پہنچائی جائے گی۔

ذرائع کا کہنا ہے کہ میچز کے دوران قذافی اسٹیڈیم میں پچاس فیصد تماشائیوں کو آنے کی اجازت دینے کا معاملہ زیرغور آیا ہے جبکہ قذافی سٹیڈیم میں 25 ہزار تماشائیوں کے بیٹھنے کی گنجائش ہے۔

ذرائع کے مطابق اسٹیڈیم میں آنے والے تماشائیوں کے پاس کورونا ویکسی نیشن کارڈ کو لازمی قرار دیا جائے گا اور کورونا ویکسی نیشن کارڈ کے بغیر کسی کو اندر جانے کی اجازت نہیں دی جائے گی۔

واضح رہے کہ پاکستان سپر لیگ (پی ایس ایل) کے ساتویں ایڈیشن کے میچز کراچی اور لاہور میں کھیلے جائیں گے جبکہ ایونٹ کا آغاز 27 جنوری سے کراچی میں ہوگا جبکہ لاہور میں میچز 10 فروری سے 27 فروری تک کھیلے جائیں گے۔

دوسری جانب کراچی میں ہونے والے میچز کے لیے 25 فیصد تماشائیوں کو داخلے کی اجازت دینے کا فیصلہ کیا گیا ہے۔

فیصلے کے مطابق کراچی میں شیڈول ہر میچ میں تقریباَ 8 ہزار تماشائیوں کونیشنل اسٹیڈیم کراچی میں داخلے کی اجازت ہوگی۔

تماشائیوں کو اسٹیڈیم میں داخلے کے لیے بارہ سال سے زائد عمر کے تمام افراد کو مکمل کووڈ 19 ویکسین ہونا لازمی ہوگا جبکہ اسٹیڈیم کے داخلی دروازوں پر اپنا درست ویکسی نیشن سرٹیفکٹ دکھانا لازمی ہوگا۔

اسٹیڈیم میں چہرے کو ماسک سے مسلسل ڈھانپے رکھنا لازم ہوگا جبکہ این سی او سی کی جانب سے جاری کردہ کووڈ 19 سے متعلق ہدایات کی خلاف ورزی کرنے والے شخص کو اسٹیڈیم سے باہر نکال دیا جائے گا۔