صوبائی دارالحکومت پشاور میں مکان کی چھت گرنے سے 2 افراد زخمی ہوگئے ہیں۔

تفصیلات کے مطابق پشاور کے علاقے متنی بازار کے قریب شاہ فارس نامی شخص کے مکان کی چھت گر گئی،  ابتدائی طور پر ملبے کے نیچے گھر کے 2 افراد دب گئے تھے۔

ریسکیو حکام کا کہنا ہے کہ ٹیموں نے موقع پر پہنچ کر امدادی کارروائیاں شروع کیں اور ملبے تلے سے دونوں زخمیوں کو نکال لیا۔

واضح رہے کہ ریسکیو 1122 میڈیکل ٹیم نے زخمیوں کو موقع پر ابتدائی طبی امداد فراہم کر کے ہسپتال منتقل کر دیا ہے۔

خیال رہے کہ  کراچی میں بھی تیز ہواؤں کے دوران  مختلف علاقوں میں ہونے والے واقعات و حادثات کے نتیجے میں  2 بچوں سمیت 6 افراد جاں بحق ہوگئے ہیں۔

کراچی میں گزشتہ روز چلنے والی تیز ہواؤں کے دوران مختلف علاقوں میں حادثات پیش آئے حادثات کے نتیجے میں  2 بچوں سمیت 6 افراد جاں بحق ہوگئے ہیں۔

ریسکیوحکام کا کہنا ہے کہ سرجانی اور اورنگی ٹاؤن میں دیوار گرنے سے دو بچے جاں بحق ہوئے، جاں بحق بچوں کی شناخت 7 سالہ عبداالرحمان اور5سالہ فرمان کےنام سے ہوئی ہے۔

اسکے علاوہ نارتھ ناظم آباد اورشیرشاہ گلبائی کے قریب پیش آنے والے حادثات میں 2افراد جان سے گئے جبکہ دیگرحادثات میں 6 افرادزخمی بھی ہوئے ہیں۔

ریسکیوحکام کے مطابق دھوراجی کالونی میں فٹ پاتھ پر سونے والا شخص بلاک لگنے سے جاں بحق ہوا  ،جاں بحق شخص نشے کا عادی تھا تاہم لاش جناح اسپتال منتقل کردی گئی ہے۔