بھارتی ریاست گوا میں اسکول اور کالجز 15 فروری تک بند رہیں گے۔ اِس بات کا فیصلہ گوا کی ریاستی حکومت نے ریاست میں بڑھتے کورونا وائرس کے کیسز کو دیکھتے ہوئے کیا ہے۔

گوا کے سیکرٹری ریوینیو سنجے کمار کی جانب سے جاری نئے آرڈر کے مطابق اسکول اور کالجز 15 فروری تک بند رہیں گے تاہم اساتذہ آن لائن کلاسز لینے کے لیے اپنے اپنے اداروں میں حاضر ہوں گے۔

حکم نامے میں یہ بھی درج ہے کہ 15 فروری تک کالج اور دیگر بڑے تعلیمی ادارے امتحانات کے انعقاد کے علاوہ بند رہیں گے جبکہ اساتذہ آن لائن کلاسز کے انعقاد کے لیے آتے رہیں گے۔

جاری کیے گئے حکم نامے میں یہ بھی کہا گیا ہے کہ ریاست بھر میں عوامی اجتماعات ہالز، آڈیٹوریمز، کمیونٹی ہالز، منڈپ اور کھلے مقامات پر 50 فیصد گنجائش کے تحت منعقد کیے جا سکیں گے۔

گوا آنے والے سیاحوں اور دیگر افراد کے لیے ہدایات ہیں کہ اُنہیں اپنے پاس کورونا ویکسین کی دونوں خوراکوں کا سرٹیفکیٹ رکھنا ہوگا اور آخری ویکسین کو 15 دن گزر چکے ہوں۔

ایسے افراد جن کا پی سی آر ٹیسٹ منفی آیا ہو اور رپورٹ کو 72 گھنٹوں سے زائد نہ گزرے ہوں، وہ بھی گوا میں داخل ہو سکتے ہیں۔

گوا حکومت کی ہدایات کی خلاف ورزی کرنے والے شخص کو بھارتی قوانین کے تحت سزا کا سامنا کرنا پڑے گا۔

ریاست گوا کے حکم کے مطابق سنیما ہالز، کیسینو، تفریحی کشتیاں، واٹر پارکس اور تفریحی پارکس وغیرہ بھی 50 فیصد گنجائش کے تحت ہی کھولے جا سکیں گے جبکہ حفاظتی تدابیر جیسے ماسک، سینیٹائزر اور تھرمل اسکریننگ وغیرہ کا استعمال بھی لازمی کیا جائے گا۔