خلاء میں موجود کچرے کو دیکھنے والے ماہرینِ فلکیات کے مطابق اسپیس ایکس فیلکن 9 راکٹ کے ٹکڑے کا مارچ میں چاند سے ٹکرانے کا امکان ہے۔

اسپیس ایکس راکٹ کا یہ بوسٹر سات سال سے خلاء میں تیر رہا ہے لیکن اب یہ ایک تصادم کی جانب گامزن ہے۔

پروجیکٹ پلوٹو کے مالک بِل گرے نے اپنے بلاگ پوسٹ میں اس تصادم کے متعلق اطلاع دی۔

گرے نے پوسٹ میں لکھا کہ یہ پہلی بار ہوگا کہ انسان کی کوئی چیز غیر ارادی طور پر چاند سے ٹکرائے گی۔

ہارورڈ کے ماہرِ فلکیات جونیتھن مک ڈویل نے منگل کو ایک ٹوئٹ میں کہا کہ لیکن اس سے گھبرانے کی کوئی بات نہیں ہے۔

انہوں نے ایک اور ٹوئٹ میں کہا کہ گرین چیز(پنیر) میں ایک اور سوراخ۔

چاند کے پاس زمین کی طرح موٹی ایٹماسفیئر کی تہہ نہیں ہے جو آنے والے چیزوں کو وہیں پر جلا دے۔

اس ہی وجہ سے جو چیزیں چاند سے جا کر ٹکراتی ہیں، اس کی سطح پر بڑی تعداد میں گڑھے بناتی ہیں۔

آرس ٹیکنیکا کے اسپیس ایڈیٹر نے پیر کو بتایا تھا کہ بوسٹر، راکٹ کا وہ حصہ جو راکٹ کو زمین سے اٹھنے کے لیے بڑے پیمانے پر توانائی دیتا ہے، فروری 2015 میں لانچ کیا گیا تھا اور اس کا وزن 3.6 ٹن کے قریب ہے۔

بوسٹر راکٹ کا بہت مہنگا حصہ ہوتا ہے اور 2015 کے آخر سے اسپیس ایکس کامیابی کے ساتھ اپنے بوسٹرز کو دوبارہ استعمال کرنے کے لیے واپس لے آتی ہے۔

آرس ٹیکنیکا کے مطابق اس بوسٹر نے لانچ کے بعد اتنا ایندھن خرچ کر دیا تھا کہ اس کو واپس نہیں لایا جاسکا۔

یہ تب سے چاند اور زمین کے درمیان گھوم رہا تھا۔

گرے نے اس کے 4 مارچ کو چاند سے ٹکرانے کی پیش گوئی کی ہے۔