پاکستان سپر لیگ ( پی ایس ایل) کے ساتویں ایڈیشن کا آغاز آج سے کراچی میں ہورہا ہے۔

پی ایس ایل کے ساتویں ایڈیشن کا افتتاحی میچ دفاعی چیمپئن ملتان سلطانز اور کراچی کنگز کے درمیان نیشنل اسٹیڈیم کراچی میں کھیلا جائے گا۔

ذرائع کے مطابق کراچی کنگز کو پہلے میچ میں محمد عامر  انجری کے سبب دستیاب نہیں  ہوں گے جبکہ  عماد وسیم جورڈن تھامسن قرنطینہ مکمل نہ ہوسکنے کے باعث پہلا میچ نہیں کھیل سکیں گے۔

مزید پڑھیے: وزیر اعظم کا پی ایس ایل کے حوالے سے اہم پیغام

عماد وسیم اور جورڈن تھامسن کا قرنطینہ ہفتہ 29 جنوری کو مکمل ہوگا۔

دوسری جانب کراچی کنگز کے مد مقابل ٹیم ملتان سلطانز  بھی اپنے ایک اہم کھلاڑی جانسن چارلس سے محروم ہوں گی۔ان کے قرنطینہ کی مدت بھی مکمل نہیں ہوسکی ہے۔

پی ایس ایل کے ساتویں سیزن کی رنگارنگ افتتاحی تقریب کا آغاز آج شام چھ بجے نیشنل اسٹیڈیم کراچی میں ہوگا جس میں  عاطف اسلم اور آئمہ بیگ اپنی آواز کا جادو جگائیں گے۔

مزید پڑھیے: پی ایس ایل ترانے میں مریم نواز کے نام کی تختی

ایونٹ  کو دو حصوں میں تقسیم کیا گیا ہے ۔ پہلے مرحلے کے میچز 7 فروری تک کراچی میں کھیلے جائیں گے جبکہ فائنل تک بقیہ تمام میچز دوسرے مرحلے میں  لاہور میں کھیلے جائیں گے۔

 نیشنل کمانڈ اینڈ آپریشن سینٹر (این سی او سی) کی ہدایت کے مطابق کراچی میں ہونے والے تمام میچز میں صرف 25 فیصد شائقین کو اسٹیڈیم میں جانے کی اجازت دی جائے گی جبکہ  لاہور میں شائقین کی تعداد کے بارے میں فیصلہ بعد میں کیا جائے گا۔