فیصل سبزواری نے کہا ہے کہ سندھ پولیس نے بلاجواز پرامن مظاہرین پر طاقت کا استعمال کیا۔

متحدہ قومی موومنٹ (ایم کیوایم) پاکستان کے رکن رابطہ کمیٹی فیصل سبزواری نے سعید غنی کی پریس کانفرنس پر ردعمل دیتے ہوئے کہا ہے کہ کل ایم کیو ایم پاکستان نے پیپلزپارٹی کے کالے بلدیاتی قانون کے خلاف ریلی کا انعقاد کیا تھا۔

انہوں نے کہا کہ شہید محمد اسلم پرامن انداز میں کالے بلدیاتی قانون کے خلاف ہونے والی ریلی میں شریک تھے ، ریلی میں بزرگ، خواتین، بچے اور بچیوں کی شرکت بلکل پرامن تھی۔

فیصل سبزواری نے کہا کہ سندھ حکومت کے ماتحت جانبدار کرمنل فورس سندھ پولیس نے بلاجواز پرامن مظاہرین پر طاقت کا استعمال کیا ، طاقت کے وحشیانہ استعمال سے اراکین اسمبلی، خواتین، نوجوان، بزرگ اور بچے زخمی ہوئے۔

متحدہ قومی موومنٹ (ایم کیوایم) پاکستان کے رکن رابطہ کمیٹی نے کہا کہ سندھ حکومت کے بےحس وزیر اسپتالوں کے نام بتا کر جائز حقوق کیلئے کراچی کے ایک شہید ہونے والے انسان کی بے توقیری کر رہے ہیں۔

انہوں نے کہا کہ شہید محمد اسلم کی ریلی میں شرکت کی فوٹیجز اور تصاویر سندھ کی ظالم اور بے حس حکومت کے جھوٹ کا بھانڈا پھوڑنے کے لئے کافی ہیں ، پیپلزپارٹی حکومت کے بےشرم وزراء مختلف تاویلیں دیکر حقائق سے منہ نہیں چرا سکتے۔

فیصل سبزواری نے کہا کہ سعید غنی جواب دیں کہ نہتے اراکین اسمبلی، بزرگ، خواتین اور بچوں پر ظلم و بربریت کے پہاڑ کیوں توڑے گئے؟