سلیم مانڈوی والا نے کہا ہے کہ سندھ حکومت صحت کارڈ کے معاملے پر سنجیدہ ہے۔

سینیٹ کی قائمہ کمیٹی برائے اطلاعات و نشریات کا چئیرمین کمیٹی فیصل جاوید کی زیر صدارت اجلاس ہوا جس میں سلیم مانڈوی والا نے صحافیوں کی فلاح کا بل پیش کیا۔

چئیرمین کمیٹی کی جانب سے سوال کیا گیا کہ وفاقی وزیر اطلاعات کہاں ہے؟ جس کے جواب میں ایڈیشنل سیکرٹری وزارت اطلاعات نے کہا کہ منسٹر صاحب وزیراعظم آفس میں ایک اہم میٹنگ میں مصروف ہیں۔

سینیٹر فیصل جاوید نے ڈپٹی چیئرمین سینیٹ سلیم مانڈوی والا کو مخاطب کرتے ہوئے کہا کہ یہ بل تو پہلے ہی حکومت لاچکی ہے کیا آپ کو اس بل پر کوئی اعتراض ہے؟ جس کے جواب میں سلیم مانڈوی والا کا کہنا تھا کہ جو بل منظور ہوا اس میں کمیشن اور اس کی پاور کا ذکر نہیں ہے۔

انہوں نے کہا کہ میں اب کمیشن کی پاور کے حوالے سے اپنا بل متعلقہ کمیٹی میں لے کر جاؤں گا ، اگر میرا بل کمیٹی میں آگیا تو میں اپنے یہ والے بل سے دستبردار ہوجاؤں گا۔

سلیم مانڈوی والا نے کہا کہ ہم جو بل لے کر آئے اس پر پیپلزپارٹی نے اعتراض کیا ، اگر کمیشن صحافیوں کو ریلیف فراہم نہیں کرسکتا تو اس بل کا کیا فائدہ ہوگا ، اگر کمیشن کے پاس پاور نہ ہوں تو وہ صحافیوں کو کیسے تحفظ دے گا۔

چئیرمین کمیٹی کا کہنا تھا کہ صحت کارڈ کی سہولت سندھ کے علاوہ پورے پاکستان میں جاری ہے۔

سلیم مانڈوی والا نے کہا کہ سندھ حکومت بھی صحت کارڈ کے معاملے پر سنجیدہ ہے۔

فیصل جاوید نے کہا کہ یہ تو آپ بریکنگ نیوز دے رہے ہیں کہ حکومت سندھ صحت کارڈ کے معاملے پر سنجیدہ ہے۔

سلیم مانڈوی والا نے کہا کہ بہت جلد معاملہ سندھ اسمبلی میں لے کر آرہے ہیں جس پر فیصل جاوید نے کہا کہ اس معاملے پر وفاق آپ کو ویلکم کرے گا۔