شاہ محمود قریشی نے کہا ہے کہ امن دشمن عناصر کو کیفرکردار تک پہنچا کر دم لیں گے۔

وزیر خارجہ مخدوم شاہ محمود قریشی نے کیچ بلوچستان میں فوجی چوکی پر دہشتگردوں کے حملے کی شدید مذمت کی اور حملے میں جوانوں کی شہادت پر گہرے دکھ و افسوس کا اظہار کیا۔

انہوں نے کہا کہ بلوچستان کے علاقے کیچ میں جام شہادت نوش کرنے والے بہادر سپوتوں کی جرات اور بہادری کو پوری قوم سلام پیش کرتی ہے ، وطن عزیز کے تحفظ کی راہ میں جام شہادت نوش کرنے والوں کی قربانیاں رائیگاں نہیں جانے دیں گے۔

شاہ محمود قریشی نے کہا ہے کہ امن دشمن عناصر کو کیفرکردار تک پہنچا کر دم لیں گے ، دہشت گردی کے خلاف پوری قوم سیسہ پلائی ہوئی دیوار کی طرح اپنی مسلح افواج کے ساتھ شانہ بشانہ کھڑی ہے۔

وزیر خارجہ مخدوم شاہ محمود قریشی نے شہداء کے لواحقین اور اہل خانہ کے ساتھ دلی تعزیت کا اظہار کیا۔

واضح رہےکہ بلوچستان میں دہشت گردوں نے چیک پوسٹ پر حملہ کردیا جس میں 10 جوان شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بلوچستان کے علاقے کیچ میں دہشت گردوں نے چیک پوسٹ پر حملہ کردیا جس کے نتیجے میں 10 جوان شہید ہوگئے۔

ترجمان پاک فوج کے مطابق فائرنگ کے تبادلے میں ایک دہشت گرد مارا گیا جب کہ کئی زخمی ہوئے۔

آئی ایس پی آر کے مطابق حملہ 25 اور 26 جنوری کی درمیانی شب کیا گیا۔

ترجمان پاک فوج کے مطابق کلیئرنس آپریشن کے دوران 3 دہشت گرد گرفتار کیے گئے، علاقے میں کلیئرنس آپریشن بدستور جاری ہے۔

آئی ایس پی آر نے کہا کہ مسلح افواج دہشتگردوں کے خاتمے کے لیے پر عزم ہیں۔