مشرقی افریقا میں اینا نامی طوفان سے ہلاکتوں کی تعداد 86 ہوگئی ہے جبکہ امدادی کارروائیاں تاحال جاری ہیں۔

برطانوی خبر ایجنسی روئٹرز کے مطابق علاقے میں ایک اور شدید طوفانی سیلاب کا خدشہ بھی ظاہر کیا جا رہا ہے۔

اینا طوفان نے بڑے پیمانے پر تباہی پھیلائی ہے جبکہ کئی لوگوں کو متاثر بھی کیا ہے۔

گزشتہ دو دن کی شدید بارشوں کے بعد طوفان اینا مڈغاسکر سے گزرا جس کے بعد جمعرات کی رات سے ملک میں ایمرجنسی نافذ کر دی گئی ہے جبکہ ہلاک ہونے والوں کی تعداد 48 سے تجاوز کر چکی ہے۔

مٹی کے تودے گرنے اور عمارتیں تباہ ہونے سے کئی لوگ ہلاک ہوئے جبکہ کئی افراد سیلاب کی زد میں آ کر ہلاک ہوئے۔

اینا طوفان 24 جنوری کو موزمبیق اور ملاوی پہنچا تھا جہاں اُس کی تباہی سے مجموعی طور پر 38 افراد ہلاک ہوئے تھے۔ اقوام متحدہ کے مطابق اینا طوفان نے تینوں ممالک میں لاکھوں افراد کو متاثر کیا ہے اور بڑے پیمانے پر تباہی کا باعث بنا ہے۔

حالیہ برسوں میں یہ خطہ کئی بار شدید طوفانوں کی زد میں رہا ہے جس میں عمارتیں، فصلیں تباہ ہوئیں اور بڑی تعداد میں لوگ بے گھر بھی ہوئے۔

ماہرین کا کہنا ہے کہ موسمیاتی تبدیلیوں کے باعث سمندری پانی گرم ہونے کی وجہ سے ایسے طوفان مزید مضبوط ہوتے ہیں اور بار بار آتے ہیں جبکہ سمندروں کی بڑھتی ہوئی سطح بھی نشیبی ساحلی علاقوں کو غیر محفوظ بنا رہی ہے۔

باتسیرائی نامی ایک اور طوفان اب افریقا کے مشرقی ساحل کی جانب بڑھ رہا ہے جس کے بارے میں فرانسیسی محکمہ موسمیات نے آج بتایا ہے کہ یہ ایک کم نوعیت کا طوفان ہے جس سے مشرقی حصے میں واقع جزیروں کو فوری طور پر کوئی خطرہ نہیں۔

نیشنل انسٹیٹیوٹ آف میٹرولوجی کے مطابق باتیسرائی طوفان میں بھی شدت اختیار کرنے کے امکانات موجود ہیں تاہم اِس کی شدت اور رفتار غیر یقینی ہے۔