وفاقی وزیر تعلیم شفقت محمود نے کہا ہے کہ پی ٹی آئی بلدیاتی الیکشن میں بھرپور تیاری سے حصہ لے گی۔

پی ٹی آئی پنجاب کے صدر شفقت محمود سے پارٹی رہنماؤں، وزراء، ایم این اے اور ایم پی ایز کی ملاقات ہوئی جس میں پارٹی تنظیم کو پنجاب میں فعال اور مضبوط بنانے پر تبادلہ خیال کیا گیا۔

ملاقات میں پنجاب میں ہونے والے بلدیاتی الیکشن پر بھی رہنماؤں نے اپنا اپنا نقطہ نظر پیش کیا۔

شفقت محمود نے ملاقات میں گفتگو کرتے ہوئے کہا کہ پی ٹی آئی بلدیاتی الیکشن میں بھرپور تیاری سے حصہ لے گی، الیکشن میں پارٹی کے فعال اور مضبوط کارکنوں کو حصہ لینے کا موقع ملے گا۔

انہوں نے کہا کہ پی ٹی آئی حکومت مہنگائی پر قابوپانے کے لئے ہرممکن اقدامات کررہی ہے، وزیراعظم عمران خان ایسی پالیسیوں پر کام کررہے ہیں جس سے غریبوں کو ریلیف ملے۔

شفقت محمود نے مزید کہا کہ پی ٹی آئی نے اپوزیشن کو ہر میدان میں شکست دی، اپوزیشن کے جھوٹ کا چورن اب بکنے والا نہیں۔

ملاقات کرنے والوں میں ایم این اے رضانصراللہ، صوبائی وزیر اعجازعالم آگسٹن، ایم پی ایز سعدیہ سہیل، ثانیہ کامران، ممنون حسین تارڑ، پی ٹی آئی سنٹرل پنجاب کے سینئر رہنماء وسابقہ جنرل سیکرٹریز سنٹرل پنجاب شعیب صدیقی اورعلی امتیازوڑائچ، غلام محی الدین دیوان، چیئرمین واسا شیخ امتیاز شامل تھے۔

اس کے علاوہ حافظ عبیداللہ، معظم وٹو، اظہر مشوانی، گوجرانوالہ سے این اے 80 سے ٹکٹ ہولڈرمیاں طارق محمود، سیدعدنان جمیل، کامران آفیشل سوشل میڈیا، یوتھ رہنماء منیب وارث، دانیال باجوہ بھی شامل تھے۔