نیشنل اسٹیڈیم میں پی ایس ایل 7 کے میچز کے دوران ننھے شائقین کرکٹ کے احتجاج کی ویڈیو سوشل ویڈیو پر وائرل ہوگئی۔

پاکستان سپر لیگ کے ساتویں ایڈیشن کے سنسنی خیز میچز کراچی کے نیشنل اسٹیڈیم میں جاری ہیں جہاں آج کھیلے گئے پہلے میچ میں ملتان سلطانز نے دلچسپ مقابلے کے بعد لاہور قلندرز کو شکست دی جب کہ گزشتہ روز پشاور زلمی نے کوئٹہ گلیڈی ایٹرز کو زیر کیا۔

نیشنل اسٹیڈیم میں جاری پی ایس ایل 7 کے میچز کے دوران تماشائی بھی بھرپور انجوائے کرتے ہوئے دکھائی دیے تاہم نیشنل اسٹیڈیم کے باہر کرکٹ کے ننھے دیوانے احتجاج کرتے ہوئے دکھائی دیے۔

بچوں کی جانب سے کراچی کے نیشنل اسٹیڈیم کے باہر احتجاج کرنے کی ویڈیو سوشل میڈیا پر وائرل ہورہی ہے جس میں گراؤنڈ کے اندر داخل نہ ہونے کی شکایت کرتے ہوئےدکھائی دے رہے ہیں۔

Advertisement

Cute kids protesting at National Stadium gates 😊😊😊#PSL7 #PZvQG pic.twitter.com/0S7jKzDnfV

— ٰImran Siddique (@imransiddique89) January 28, 2022

ویڈیو میں دیکھا جاسکتا ہے کہ 5 بچے نیشنل اسیٹیڈیم کے باہر بیٹھے ہوئے ہیں اور ویڈیو بنانے والے شخص سے کہہ رہے ہیں کہ ہماری شکایت حکام تک پہنچائیں کہ ہمیں اندر نہیں جانے دیا جارہا ہے۔

ویڈیو میں ایک بچے نے کہا کہ ہمیں پہلے یہ نہیں بتایا گیا کہ کورونا ویکسین لگواکر آنی ہے، ہمیں ٹکٹ دے دیے اور اب کہہ رہے ہیں کہ ویکسین نہیں لگوائی اس لیے اندر نہیں جاسکتے جب کہ ہمیں ٹکٹ کے پیسے بھی واپس نہیں کیے جارہے ہیں۔

ویڈیو میں ایک اور بچے نے کہا کہ آپ ہماری ویڈیو اپ لوڈ کرکے وائرل کروائیں تاکہ ہمیں میچ دیکھنے کی اجازت مل سکے یا پھر ہمارے پیسے واپس مل جائیں۔

دوسری جانب سوشل میڈیا صارفین کی جانب سے بچوں کے احتجاج کی ویڈیو پر دلچسپ تبصرے کیے جارہے ہیں جب کہ ایک صارف نے پاکستان کرکٹ بورڈ کی جانب سے کی گئی ایک ٹوئٹ بھی شیئر کی۔ ٹوئٹ میں پی سی بی نے اعلان کیا کہ وہ 12 سال سے کم عمر بچوں کے لیے خریدے گئے  تمام ٹکٹ کے پیسے واپس کردیں گے۔

ایک صارف نے لکھا ’’ان بچوں نے فری میں ویکسین نہیں لگوانی اور پیسے دیکر میچ دیکھنے پہنچ گئے ، ان کے والدین کو 69 توپوں کی سلامی دینی چاہیے۔