بھارتی پولیس نے حال ہی میں ایک خاتون کے مبینہ اغوا اور اجتماعی زیادتی کے الزام میں کئی خواتین سمیت 11 افراد کو گرفتار کرنے کا دعویٰ کیا ہے۔

بھارت میں خاتون سے جنسی زیادتی کا یہ تازہ ترین واقعہ ہے جس کی ملک بھر میں مذمت کی جا رہی ہے۔ نئی دہلی کے وزیراعلیٰ اروند کیجریوال نے اس واقعے کو شرمناک قرار دیا تھا۔

گینگ ریپ کے بعد خاتون کو نئی دہلی کی سڑکوں پر بھی گھمایا گیا۔ اس واقعے کی فوٹیج سوشل میڈیا پر بھی گردش کر رہی ہے۔

وڈیو میں دیکھا جا سکتا ہے کہ تشدد کا نشانہ بننے والی خاتون کے چہرے پر سیاہی مل دی گئی اور ان کے بال بھی کاٹے گئے جبکہ کئی خواتین ان کو دھکیل رہی ہیں اور ان پر جملے کس رہی ہیں۔ راہگیر اس واقعے پر خوشی کا اظہار کر رہے تھے اور اپنے موبائل فون سے وڈیو بھی بنا رہے تھے۔

پولیس کے ڈپٹی کمشنر آر ستھیا سندرام کا کہنا ہے کہ یہ واقعہ مشرقی دہلی کے علاقے شاہدرہ میں بدھ کے روز پیش آیا تھا اور یہ ہمسایوں کے درمیان پرانی دشمنی کا نتیجہ ہے۔

میڈیا رپورٹس کے مطابق ملزمان کے ایک 16 سالہ رشتہ دار نے مبینہ طور پر اس خاتون کی وجہ سے ٹرین کے سامنے کُود کر خودکشی کرلی تھی۔

ڈپٹی کمشنر آر ستھیا سندرام کا کہنا ہے کہ دو کم عمر افراد سمیت تمام 11 افراد کو گرفتار کرلیا گیا ہے جن کا تعلق ایک ہی خاندان سے ہے۔ وڈیو میں واضح طور پر دیکھا جا سکتا ہے کہ خواتین سب سے آگے تھیں۔

متاثرہ خاتون نے پولیس کو بتایا کہ اس خاندان کے افراد نے اُن کو اغوا کیا، کئی مردوں اور نابالغ لڑکوں نے ان کو جنسی تشدد کا نشانہ بنایا، اُن پر انڈے پھینکے گئے، لاٹھیوں سے مارا اور سڑکوں پر گھسیٹا گیا۔

پولیس دیگر ملزمان کی شناخت کے لیے وڈیوز کا جائزہ لے رہی ہے جبکہ متاثرہ خاتون جو دو برس کے بچے کی ماں ہے، کی کونسلنگ کی جا رہی ہے۔