جرمنی میں ’’نادیہ‘‘ جبکہ دیگر ممالک میں ’’مَلِک‘‘ کا نام پانے والا یہ طوفان گزشتہ روز یورپ کے شمالی حصوں سے ٹکرایا ہے۔ تیز ہواؤں کے سبب ساحلی علاقوں میں سیلابی ریلے آئے اور ٹرانسپورٹ کا نظام بھی متاثر ہوا۔

طوفانی ہواؤں نے برطانیہ، اسکاٹ لینڈ، ڈنمارک، جرمنی، پولینڈ اور جمہوریہ چیک میں تباہی مچا دی ہے۔ لاکھوں گھر بجلی سے محروم ہوگئے۔

طوفانی ہواؤں کی وجہ سے پُلوں کو بند کر دیا گیا ہے، ٹرین سروس معطل کر دی گئی جبکہ ساحلی علاقوں میں سیلابی ریلوں کے سبب فیریز کو لنگر انداز کر دیا گیا ہے۔

بحیرہ شمالی اور بحیرہ بالٹک کے ساحلی علاقوں میں ہفتے کے روز سے طوفانی ہوائیں چلنا شروع ہوگئی تھیں۔

اتوار کے روز جب یہ طوفان مشرق کی جانب بڑھنا شروع ہوا تو جرمن دارالحکومت برلن کے فائر ڈپارٹمنٹ نے ایمرجنسی نافذ کر دی اور عوام کو ہدایت کی کہ وہ جہاں کہیں بھی ہیں گھروں کے اندر ہی رہیں۔

جرمنی کے شمالی شہر بریمن میں فائر ڈپارٹمنٹ کے مطابق شہر بھر میں کئی مقامات پر درخت گرنے کے واقعات پیش آئے۔

ہفتے کو جرمن ریاست برانڈنبرگ کے شہر بیلیٹز میں تیز ہوا کے سبب ایک انتخابی پوسٹر اُکھڑ کر ایک شخص کو لگا جس سے وہ ہلاک ہوگیا جبکہ اُس کا ایک ساتھی زخمی بھی ہوا۔

جرمن ریاست شلیسوگ ہولشٹائن میں درخت گرنے سے ٹرین سروس معطل ہوگئی۔

اسکاٹ لینڈ میں 160 کلومیٹر فی گھنٹہ کی رفتار سے تیز ہوائیں چلیں۔ آبردین کے علاقے میں ایک 60 سالہ خاتون درخت گرنے سے ہلاک ہوگئیں۔

وسطی برطانیہ میں ایک 9 سالہ لڑکا بھی درخت گرنے سے ہلاک اور ایک شخص زخمی بھی ہوا۔ برطانیہ بھر میں بجلی کے تار ٹوٹنے سے تقریباً 130,000 گھر بجلی سے محروم ہوگئے۔

پولینڈ میں بحیرہ بالٹک کے کنارے پر واقعے علاقے ویخیروو میں بھی درخت گرنے کے واقعے میں ایک شخص ہلاک جبکہ ایک زخمی ہوا۔ ملک بھر میں 680,000 افراد بجلی سے محروم ہوئے۔

جمہوریہ چیک کے ایک صنعتی علاقے میں دیوار گرنے سے ایک شخص موقع پر ہی ہلاک ہوگیا۔ اسی طرح ڈنمارک میں بھی تیز ہواؤں کے سبب گرنے والی دیوار سے 78 سالہ خاتون موت کے منہ میں چلی گئیں۔

ڈنمارک کو سوئیڈن سے ملانے والے ٹریفک اور ریلوے کے مشترکہ پُل اوریزون اور اِس سے مُنسلک دیگر پلوں کو بھی ٹریفک کے لیے بند کر دیا گیا۔