نیٹو اور برطانیہ نے ممکنہ روسی حملے کی صورت میں یوکرائن کی مدد کیلیے اپنی افواج بھیجنے سے انکار کر دیا ہے۔

نیٹو سیکرٹری جنرل ژینز اسٹولٹن برگ نے کہا ہے کہ اگر روس نے  یوکرائن پر حملہ  کیا تو نیٹو یوکرائن میں اپنی فوجیں نہیں بھیجے گا۔

انہوں نے برطانوی نشریاتی ادارے کو انٹرویو دیتے ہوئے کہا کہ نیٹو کا رکن ملک ہونے اور ایک اہم اور مضبوط شراکت دار جیسا کہ یوکرائن، میں فرق ہے۔

دوسری جانب برطانوی سیکرٹری خارجہ لِز ٹرَس نے اسکائی نیوز سے گفتگو میں کہا کہ برطانیہ روسی صدر ولادیمیر پیوٹن پر پابندیاں مزید سخت کرنے کی کوشش کرے گا تاکہ ان کی حکومت کے اہم ارکان کو کہیں چھپنے کی جگہ نہ مل سکے۔

لز ٹرس نے کہا کہ اس بات کا بہت کم امکان ہے کہ برطانوی فوجیں یوکرائن کے لیے لڑائی میں حصہ لیں۔ ان کے بقول ہم یوکرائنی فورسز کو ہر ممکن مدد کی فراہمی یقینی بنانا چاہتے ہیں۔

گزشتہ ہفتے امریکا نے خبردار کیا تھا کہ برطانیہ کی طرف سے روسی ’’کالا دھن‘‘ قبول کرنے سے روس پر دباؤ بڑھانے کی امریکی پابندیاں متاثر ہوں گی۔

لندن سیاسی اثرورسوخ رکھنے والی روسی کاروباری شخصیات اور ان کی دولت کے لیے ایک پرکشش مالیاتی مرکز ہے اسی لیے اِسے لنڈن گریڈ بھی کہا جاتا ہے۔

امریکی نیوز چینل سی این این کے مطابق برطانوی وزیراعظم بورس جانسن اور روسی صدر ولادیمیر پیوٹن کے مابین رواں ہفتے بات چیت متوقع ہے۔

روسی وزیر خارجہ سرگئی لاوروف نے روسی ٹیلی ویژن پر گفتگو کرتے ہوئے کہا ہے کہ روس فقط اپنے مفادات کا دفاع  کرنا چاہتا ہے۔

روس کے قومی سلامتی کے مشیر نکولائی پیٹروشیف نے یوکرائن پر حملے کو محض افواہیں قرار دیتے ہوئے اسے مغرب کا خود ساختہ جھوٹ قرار دیا ہے۔ پیٹروشیف کا کہنا ہے روس نہ تو جنگ چاہتا ہے اور نہ ہی اسے اس کی ضرورت ہے۔

آسٹریا کے نائب چانسلر ہائنز کرسٹیان سٹراخا بھی روس پر پابندیوں اور مشرقی یورپ میں نیٹو کے آپریشنز میں توسیع کے خلاف ہیں۔