لیسکو کی محمود بوٹی سب ڈویژن میں بجلی چوری کے خلاف بڑی کارروائی 57 غیر قانونی کنکشن پکڑے گئے۔

تفصیلات کے مطابق لاہور الیکٹرک سپلائی کمپنی(لیسکو) کے چیف ایگزیکٹوچوہدری محمد امین کی ہدایات پرتمام سرکلز میں بجلی چوروں کیخلاف بڑے پیمانے پر سرچ آپریشن کئے جا رہے ہیں۔

اسی سلسلے میں ایس ڈی او محمود بوٹی آصف علی خان نے اپنے اسٹاف کے ہمراہ سب ڈویژن کے زیرانتطام علاقوں میں آپریشن کیاجس کے نتیجے میں کل بجلی کے 167کنکشن کی جانچ کی گئی ۔ جانچ کے دوران 57 کنکشنز میں مختلف نوعیت کی بے ضابطگیاں سامنے آئیں۔

ایس ڈی او آصف علی خان کے مطابق پکڑے جانے والے کنکشن میں 57ایسے میٹر تھے جو کہ ڈائریکٹ سپلائی سے بجلی چوری کر رہے تھے۔ پکڑے جانے والے کنکشن میں ایک کنکشن پولیس اہلکار کا تھا جو کہ ڈائریکٹ سپلائی سے بجلی چوری کررہا تھا۔

پکڑے جانے پر پولیس اہلکار نے واپڈ ا کے عملہ پر تشدد کیا اور دھمکایا۔

ایس ڈی او آصف خان نے بتایا کہ اس کے خلاف ایف آئی آرتھانہ مناواں میں درج کروا دی گئی ہے جبکہ باقی تمام پکڑے جانے والے بجلی چوروں کے خلاف بھی ایف آئی آر کے اندراج کے لئے درخواستیں متعلقہ تھانوں میں جمع کروا دی گئی ہیں۔

بے ضابطہ کنکشن منقطع کرکے65,000یونٹس بھی ڈٹیکشن بل کی مد میں چارج کئے گئے ہیں۔

چیف ایگزیکٹو چوہدری محمد امین کی ہدایت پر لیسکو میں بجلی چوری کے مکمل خاتمے کے لئے ٹاسک فورس اور لیسکو آپریشن اور سرویلنس کی ٹیموں کی جانب سے بجلی چوروں کے خلاف مہم جاری ہے۔اس کے ساتھ ساتھ ڈیڈ ڈیفالٹرز سے واجب الادا رقومات کی وصولی کا سلسلہ بھی جاری ہے۔