انڈر 19 ورلڈکپ میں بلیو شرٹس نے کینگروز کو واپسی کا پروانہ تھمادیا۔

تفصیلات کے مطابق ویسٹ انڈیز میں جاری انڈر 19 ورلڈکپ کے پہلے سیمی فائنل میں بھارتی ٹیم آسٹریلیا کو 96 رنز سے شکست دے کر فائنل میں پہنچ گئی۔

 ٹاس جیت کر پہلے بیٹنگ کرتے ہوئے بھارت نے 290 رنزاسکور بورڈ  پرسجائے۔ مڈل آرڈر بلے باز شیخ رشید نے 108 گیندوں کا سامنا کرتے ہوئے 94 رنز کی اننگز کھیلی۔ انکی اننگ 8 چوکوں اور 1 چھکے پر مشتمل تھی۔

 جبکہ کپتان یش دھل نے 110 رنز کی بہترین اننگر کھیلتے ہوئے ٹیم کے اسکور کو 290 رنز تک پہنچانے میں کلیدی کردار ادا کیا۔

آسٹریلوی گیند بازوں کی کارکردگی واجبی سی رہی۔ ٹام وہیٹنی 9 اوورز میں 74 رنز دے کر کافی مہنگے ثابت ہوئے۔ جیک نسبیٹ اور ولیم سلزمن 1،1 وکٹ لینے میں کامیاب ہوئے۔

جواب میں آسٹریلوی بیٹنگ لائن اپن کے قدم اننگر کی شروعات میں ڈگمگا گئے۔ پوری ٹیم صرف 194 رنز بنا کر پویلین لوٹ گئی۔ کپتان کوپر کونولی 3 رنز بناکر آؤٹ ہوئے۔ لاچن شا کی 51 رنز کی مزاحمت بھی ٹیم کے کام نہ آسکی۔

بھارتی گیند بازوں نے بہترین گیند بازی کا مظاہرہ کیا۔ وکی اوستول، روی کمار اور نشانت سندھو نے بالترتیب 3 اور 2، 2 وکٹین حاصل کیں۔

بہترین بلے بازی کے باعث بھارتی کپتان یش دھل مرد میدان قرار پائے۔