محمود خان کا کہنا ہے کہ ملک میں ترقی و خوشحالی تب تک ممکن نہیں جب تک مکمل امن و امان نہ ہو۔

وزیراعلیٰ خیبر پختونخوا محمود خان کی زیر صدارت پشاور میں امن و امان سے متعلق اہم اجلاس ہوا جس میں صوبہ بھر میں امن وامان کی مجموعی صورتحال کا تفصیل جائزہ لیا گیا۔

اجلاس میں چیف سیکرٹری، آئی جی پی اور متعلقہ انتظامی سیکرٹریوں کے علاوہ 11 کور کے نمائندوں اور دیگر اعلیٰ سول و عسکری حکام نے شرکت کی۔

وزیراعلیٰ خیبر پختونخوا نے صوبے میں بدامنی کے بڑھتے واقعات پر تشویش کا اظہار کیا اور صوبے میں امن و امان کی صورتحال کو بہتر بنانے کے لئے اہم فیصلے لئے۔

اجلاس میں بدامنی کے واقعات سے موثر انداز میں نمٹنے کے لیے سی ٹی ڈی کو مزید مستحکم بنانے اور اس کا دائرہ کار اضلاع تک بڑھانے کا فیصلہ کیا۔

اجلاس میں بدامنی کے واقعات کی روک تھام کے لئے تمام متعلقہ سول و عسکری اداروں کے درمیان کوآرڈینیشن کا موثر نظام وضع کرنے کے لئے اعلیٰ سطح کا ایک فورم تشکیل دینے پر بھی اتفاق کیا گیا۔

اس کے علاوہ اجلاس میں امن و امان کی صورتحال کا جائزہ لینے کے لئے تمام اداروں کا باقاعدگی سے ماہانہ اجلاس منعقد کرنے کا فیصلہ کیا۔

اجلاس میں دہشتگردوں کی سہولت کاری اور معاونت کے موثر توڑ کے لئے میکنزم تشکیل دینے کا بھی فیصلہ کیا گیا اور دہشتگردی کے واقعات کے مستقل بنیادوں پر تدارک کے لئے قومی سطح پر مربوط کوششوں کی ضرورت پر زور دیا۔

وزیراعلیٰ خیبر پختونخوا نے اجلاس میں متعلقہ اداروں کو صوبے میں جاری میگا پراجیکٹس کے سیکیورٹی پلان کا ازسر نو جائزہ لینے اور اسے فول پروف بنانے کے لئے ضروری اقدامات کی ہدایت دی۔

انہوں نے ہدایت دی کہ اجلاس میں جن جن محکموں اور اداروں کو جو بھی ذمہ داریاں دی گئی ہیں وہ اگلے اجلاس میں ان پر پیشرفت کی رپورٹ پیش کریں۔

محمود خان نے کہا کہ پولیس خصوصاً سی ٹی ڈی کی استعداد کار کو بڑھانے کے لئے درکار مالی وسائل فوری فراہم کیے جائیں۔

وزیراعلیٰ کا کہنا ہے کہ زمینوں پر ناجائز قبضہ کرنے والوں اور منشیات فروشوں کے خلاف موثر کارروائیاں عمل میں لائی جائیں۔

انہوں نے مزید کہا کہ امن و امان کو برقرار رکھنا میری حکومت کی اولین ترجیح اور اہم ذمہ داری ہے، ہم کسی صورت  غافل نہیں ہوسکتے، ترقی و خوشحالی تب تک ممکن نہیں جب تک مکمل امن و امان نہ ہو، صوبائی حکومت اس مقصد کے لئے تمام تر مالی وسائل فراہم کرے گی۔