کراچی میں مثبت کیسز کی شرح گھٹ کر 13.74 فیصد پر آگئی ہے۔

محکمہ صحت سندھ کی جانب سے جاری کردہ اعداوشمار کے مطابق کراچی میں گزشتہ چوبیس گھنٹوں میں مثبت کیسز کی شرح 13.74 فیصد رپورٹ ہوئی۔

محکمہ صحت کے ذرائع نے بتایا کہ سندھ میں گزشتہ چوبیس گھنٹوں میں 1733 کیسز رپورٹ ہوئے، جن میں سے 1148 کیسز کا تعلق کراچی سے ہے۔

گزشتہ چوبیس گھنٹوں میں سندھ میں 9 مریض انتقال کر گئے، 409 مریض مختلف اسپتالوں میں زیر علاج ہیں، جن میں سے 368 مریض کی حالت تشویشناک جبکہ  44 مریض وینٹیلیٹر پر زیر علاج ہیں۔

ماہرین صحت کی اپیل

ماہرین صحت کا کہنا ہےکہ روزانہ رپورٹ ہونے والے زیادہ تر کیسز اومیکرون کے ہیں، فروری کے وسط تک یہ لہر اپنے عروج پر ہوگی۔

ماہرین صحت نے اپیل کی ہے کہ شہری ویکسینیشن کروائیں اور بوسٹر ڈوزلگوائیں۔

ملک بھر میں کورونا کے پھیلاؤ نے سنگین صورتحال اختیار کر لی ہے، گزشتہ روز ملک بھر میں مزید 6137 افراد کورونا کا شکار ہوئے ہیں۔

نیشنل کمانڈ اینڈ آپریشن سینٹر(این سی او سی) کے تازہ ترین اعدادوشمار کے مطابق گزشتہ 24 گھنٹوں کے دوران مثبت کیسز کی شرح9.67 فیصد ریکارڈ کی گئی ہے۔

این سی او سی کے مطابق کورونا وائرس سے 28 افراد جاں بحق ہوگئے، جس کے بعد اموات کی تعداد 29 ہزار 448 ہوگئی ہے۔

پاکستان میں کورونا کے تصدیق شدہ کیسز کی تعداد 14 لاکھ 54 ہزار 800 ہوگئی ہے۔

نیشنل کمانڈ اینڈ آپریشن سینٹرکے مطابق گزشتہ 24 گھنٹوں کے دوران 6 ہزار 137 نئے کیسز رپورٹ ہوئے۔

پنجاب میں 4 لاکھ 87 ہزار 407، سندھ میں 5 لاکھ49 ہزار 872، خیبرپختونخوا میں 2 لاکھ 7 سو 10، بلوچستان میں 34 ہزار 711، گلگت بلتستان میں 10 ہزار 873، اسلام آباد میں ایک لاکھ 30 ہزار 872 جبکہ آزاد کشمیر میں 40 ہزار 355 کیسز رپورٹ ہوئے ہیں۔