سینیٹر سلیم مانڈوی والا کا کہنا ہے کہ  موجودہ حکومت کشمیر مسئلے کے حل کے لئے مکمل طور پر ناکام ہو چکی ہے۔

سینیٹر سلیم مانڈوی والا نے پانچ فروری یوم یکجھتی کشمیر سے متعلق بیان دیتے ہوئے کہا کہ یوم یکجھتی کے موقعے پر کشمیریوں پر جاری بھارتی جبر اور ظلم کی شدید مذمت کرتے ہیں۔

سلیم مانڈوی والا  نے کہا کہ پیپلزپارٹی کشمیریوں کے حقوق اور خود ارادیت کے لئے اپنی جدوجہد جاری رکھے گی۔

 سلیم مانڈوی والا کا کہنا تھا کہ مقبوضہ کشمیر میں آج کرفیو نافذ ہے اور انسانی اور بنیادی حقوق کی دھجیاں بکھیری جا رہی ہیں،  افسوس سے کہنا پڑا رہا ہے کہ تمام دعوؤں کے باوجود موجودہ حکومت کشمیر مسئلے کے حل کے لئے مکمل طور پر ناکام ہو چکی ہے۔

سلیم مانڈوی والا کا کہنا تھا کہ کشمیریوں پر جاری ظلم و ستم تحریک انصاف کی سفارتی ناکامی کا واضح ثبوت ہے، کشمیر میں جاری بھارتی مظالم پر عالمی برادری کی خاموشی بھی قابل افسوس ہے۔

انہوں نے مزید کہا کہ اقوام متحدہ سمیت عالمی برادری مقبوضہ کشمیر میں بھارتی مظالم کو روکنے کے لئے متحرک ہو۔

واضح رہے کہ پاکستان سمیت دنیا بھر میں آج مقبوضہ کشمیریوں کے حق خود اردیت کی حمایت میں یوم یکجہتی کشمیر منایا جارہا ہے۔

کشمیریوں کے حق خود ارادیت کی حمایت اور بھارتی قابض فوج کے مظالم کے خلاف ملک سمیت دنیا بھر میں پاکستانی آج یوم یکجہتی کشمیر منارہے ہیں۔

یوم یکجہتی کشمیر کی مناسبت سے ملک بھر میں سماجی ، سیاسی اور مذہبی تنظیموں کی جانب سے خصوصی ریلیوں، جلسوں، احتجاجی مظاہروں اور سیمینارز کا انعقاد کیا جارہا ہے۔