وزیرخارجہ شاہ محمود قریشی نے کہا ہے کہ پائیدار امن کے قیام کے لیے کشمیر کا منصفانہ حل ضروری ہے۔ 

کمشیر مکی سنگین صورتِ حال پر وزیر خارجہ شاہ محمود قریشی نے اقوام متحدہ کی سلامتی کونسل کے صدر اور سیکریٹری جنرل کو خط لکھا ہے۔

وزیر خارجہ نے خط میں اقوام متحدہ کی سلامتی کونسل کے صدر اور سیکریٹری کو غیر قانونی طور پر بھارت کے زیر قبضہ جموں و کشمیر کی سنگین صورتحال سے آگاہ کیا۔

وزیر خارجہ نے خط کے ذریعے مقبوضہ جموں و کشمیر میں انسانی حقوق کی خلاف ورزیوں، ماورائے عدالت اور جعلی مقابلوں میں شہادتوں کی حالیہ لہر کو اجاگر کیا ہے۔

خط میں وزیرخارجہ شاہ محمود قریشی نے لکھا ہے کہ 5 اگست 2019 کے غیرقانونی اور یک طرفہ بھارتی اقدامات عالمی قوانین، اقوام متحدہ کے منشور اور چوتھے جینیوا کنونشن سمیت اقوام متحدہ کی سلامتی کونسل کی متعلقہ قراردادوں کی کھلم کھلا خلاف ورزی ہے۔

وزیرخارجہ نے خط میں کہا ہے کہ پاکستان بھارت سمیت تمام ہمسایہ ممالک کے ساتھ پرامن تعلقات کا خواہاں ہے۔ جنوبی ایشیاءمیں پائیدار امن وسلامتی کے قیام کے لیے تنازع جموں وکشمیر کا منصفانہ حل ضروری ہے۔

شاہ محمود قریشی کا خط میں کہنا تھا کہ بامعنی اور نتیجہ خیز ربط و تعلق استوار کرنے کے لیے سازگار ماحول تشکیل دینے کی ذمے داری بھارت پر عائد ہوتی ہے۔