چیئرمین بلاول بھٹو زرداری نے کہا ہے کہ پاک افغان سرحد پر دہشت گردی کا اس طرز کا واقعہ انتہائی تشویش کا باعث ہے۔

اپنے ایک بیان میں پاکستان پیپلزپارٹی کے چیئرمین بلاول بھٹو زرداری نے ضلع کرم کی حدود میں پاک افغان سرحد پر دہشت گردوں کی فائرنگ کی مذمت ہے۔

بلاول بھٹو نے کہا کہ دہشت گردوں سے مقابلے کے دوران شہید ہونے والے پاک فوج کے پانچ جوانوں کی قربانی رائیگاں نہیں جائے گی۔

پاکستان پیپلزپارٹی کے چیئرمین بلاول بھٹو زرداری کا مزید کہنا تھا کہ پاک افغان سرحد پر دہشت گردی کا اس طرز کا واقعہ انتہائی تشویش کا باعث ہے، پڑوسی ملک افغانستان کی حکومت کو اپنی سرحد سے ہونے والی دہشت گردی کی کارروائیاں روکنا ہوں گی۔

واضح رہے کہ افغان بارڈر پر دہشت گردوں کی سرحد پار سے فائرنگ کے نتیجے میں 5 سیکیورٹی اہلکار شہید ہوگئے۔

پاک فوج کے شعبہ تعلقات عامہ(آئی ایس پی آر) کی جانب سے جاری کردہ بیان میں کہا گیا ہے کہ پاک افغان بارڈر پر دہشت گردوں نے سرحد پار سے فائرنگ کی ، دہشت گردوں نے ضلع کرم میں پاک افغان بارڈر پر فوجی جوانوں کو نشانہ بنایا۔

آئی ایس پی آر کے مطابق فائرنگ کے تبادلے میں دہشت گردوں کو بھاری جانی نقصان ہوا جبکہ دہشت گردوں کی فائرنگ سے5سیکیورٹی اہلکار شہید ہوگئے۔

آئی ایس پی آر کا کہنا ہے کہ شہید ہونے والوں میں لانس نائیک عجب نور، سپاہی ضیااللہ ، ناہید اقبال، سمیر اللہ اور ساجد علی شہید شامل ہیں۔

 آئی ایس پی ار کا یہ بھی کہنا ہے کہ افغان عبوری حکومت ایسی سرگرمیوں کو روکنےکیلئے اقدامات کرے۔

آئی ایس پی آر کا مزید کہنا ہے کہ پاک فوج ملکی سرحدوں کے دفاع کیلئے پر عزم ہے، ہمارے بہادر جوانوں کی قربانیاں ہمارےعزم کو مضبوط کرتی ہے۔