فواد چوہدری کا کہنا ہےکہ سیکیورٹی فورسز کے جوان ہمارا فخر اور مان ہیں۔

وفاقی وزیر اطلاعات و نشریات فواد چوہدری نے سماجی رابطے کی ویب سائٹ ٹوئٹر پر جاری اپنے پیغام میں کہاکہ وزیراعظم اور آرمی چیف آج کا دن بلوچستان میں سیکیورٹی فورسز کے جوانوں کے ساتھ گزاریں گے۔

انہوں نے کہاکہ سیکیورٹی فورسز کے جوان جن کے عزم پہاڑوں سے بلند اور جذبوں میں سمندروں سے زیادہ وسعت ہے ہمارا فخر بھی ہیں اور ہمارا مان بھی، پاکستان کے یہ بیٹے مادر وطن کیلئے سربکف ہیں۔

آج کابینہ کا اجلاس منسوخ کردیاگیا ہے، وزیراعظم اور آرمی چیف آج کا دن بلوچستان میں سیکیورٹی فورسز کے جوانوں کے ساتھ گزاریں گے،جوان جن کے عزم پہاڑوں سے بلند اور جذبوں میں سمندروں سے زیادہ وسعت ہے ہمارا فخر بھی ہیں اور ہمارا مان بھی، پاکستان کے یہ بیٹے مادر وطن کیلئےسربکف ہیں

Advertisement

— Ch Fawad Hussain (@fawadchaudhry) February 8, 2022

فواد چوہدری نے اپنی ٹوئٹ میں مزید کہاکہ آج کابینہ کا اجلاس منسوخ کردیاگیا ہے۔

وزیراعظم اور آرمی چیف کا دورہ بلوچستان

وزیراعظم عمران خان اور آرمی چیف آج بلوچستان کا دورہ کر رہے ہیں۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ  بیان کے مطابق آرمی چیف جنرل قمر جاوید باجوہ نوشکی پہنچ گئے ہیں۔

 آئی ایس پی آر کے مطابق آرمی چیف نوشکی میں جوانوں کےساتھ وقت گزاریں گے اور دہشتگردوں کا حملہ پسپا کرنے والے جوانوں سے ملاقات بھی کرینگے۔

اس موقع پر آرمی چیف کو علاقے کی سیکیورٹی کی صورتحال پر تفصیلی بریفنگ دی جائے گی۔

ترجمان پاک فوج کے مطابق آرمی چیف کو دہشت گردوں سے نمٹنے کے لیے فارمیشن کی آپریشنل تیاریوں سے متعلق بھی آگاہ کیا جائےگا۔

وزیراعظم کوئٹہ پہنچ گئے

وزیراعظم عمران خان بھی ایک روزہ دورے پر بلوچستان پہنچ گئے ہیں ۔

دورے کے دوران وزیراعظم گورنر بلوچستان، وزیراعلیٰ بلوچستان، وفاقی و صوبائی وزرا کے ہمراہ نوشکی جائیں گے، جہاں یادگار شہدا پر پھول چڑھائیں گے۔

وزیراعظم نوشکی میں ایف سی کے جوانوں سے خطاب کریں گے۔

وزیراعظم کو نوشکی کیمپ پر دہشتگردوں کے حملے کے حوالے سے بریفنگ بھی دی جائےگی۔