دفتر خارجہ کی جانب سے بیان جاری کیاگیا ہے کہ اردن میں آتشزدگی کے واقعے میں 13 پاکستانی جاں بحق ہوئے۔

ترجمان دفتر خارجہ ڈاکٹرفیصل کے مطابق اردن میں ‏جاں بحق پاکستانیوں میں 7 بچے، 4 خواتین اور 2 مرد شامل ہیں جبکہ ‏واقعے میں 3 پاکستانی زخمی بھی ہوئے۔

ترجمان  دفتر خارجہ کے مطابق ‏جاں بحق افراد اورزخمیوں کا تعلق ضلع دادو سے ہے جن سے رابطہ کیاجارہا ہے۔

واضح رہے کہ گزشتہ روزاردن میں ایک کھیت میں قائم خیموں میں آگ لگنے سے7بچوں سمیت 13 پاکستانی جاں بحق  ہوگئے ۔

دفتر خارجہ کی اطلاعات کے مطابق آتشزدگی کا واقعہ اردن کے دارالحکومت عمان سے 40کلو میڑ مغرب میں بحیرہ مردار کے قریب واقع کرامہ نامی قصبے میں پیش آیا جہاں زراعت کے شعبے سے منسلک پاکستان خاندان مقیم تھا۔ آتشزدگی کا واقعہ رات دو بجے پیش آیا۔

آتشزدگی میں ہلاک ہونے والے جوئیہ خاندان کا تعلق صوبہ سندھ کے ضلع دادؤ سے ہیں جو 1970 سے وہاں مقیم ہے۔ خاندان کے سربراہ علی شیر جوئیہ محفوظ رہے ہیں۔

آتشزدگی کے واقعے میں7 بچے، 4 عورتیں اور دو مرد ہلاک ہوئے ہیں۔ آتشزدگی کے اس واقعے میں 3 افراد زخمی ہوئے ہیں جن کا علاج جاری ہے۔

دفتر خارجہ کے مطابق زخمی ہونے والے اشخاص کی حالت خطرے سے باہر ہے۔

اطلاعات کے مطابق آتشزدگی کا واقعہ ممکنہ طور پر بجلی کے شارٹ سرکٹ کی وجہ سے پیش آیا ہے۔

خیال رہے کہ وادی اردن ایک زرخیز علاقہ ہے جہاں ہزاروں کی تعداد میں غیر ملکی مزدور نجی زمینوں پر رہتے ہیں۔

حالیہ سالوں میں اردن میں کیمپوں میں رہنے والے شامی مہاجرین کی ہلاکت کے بھی کئی واقعات سامنے آئے ہیں جن میں بجلی کی خرابی سے آگ لگنا یا گیس کے چولہوں سے دم گھٹنا شامل ہیں۔