آرمی چیف جنرل قمر جاوید باجوہ نے کہا ہے کہ دہشتگردوں کو شکست دینے کیلئے سہولت کاروں کا گٹھ جوڑ ختم کرنا ہوگا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے پنجگور کا دورہ کیا اورپنجگور حملہ پسپا کرنے والے فوجی جوانوں کے ساتھ دن گزارا۔

آئی ایس پی آر کے مطابق آرمی چیف کو مقامی کمانڈر کی جانب سے سیکیورٹی صورتحال پر تفصیلی بریفنگ دی گئی، آرمی چیف کو ابھرتے ہوئے خطرات سے نمٹنے کے میکنزم پر بھی بریفنگ دی گئی۔

آرمی چیف نے جوانوں سے خطاب میں بروقت اور مؤثر ردعمل کی تعریف کرتے ہوئے کہا کہ دہشتگردوں کو شکست دینے کیلئے سہولت کاروں کا گٹھ جوڑ ختم کرنا ہوگا۔

آرمی چیف نے کہا کہ دہشتگردی کو شکست دینے کیلئے دہشتگردوں اور سہولت کاروں کا نیٹ ورک توڑنا ہو گا، مقامی آبادی کی سیکیورٹی اور تحفظ یقینی بنائیں گے، قربانیوں سے حاصل ہونے والے ثمرات کو دہشتگردوں کو ضائع نہیں کرنے دیں گے۔

جنرل قمر جاوید باجوہ نے کہا کہ جوان اپنی آپریشنل تیاریارں برقرار رکھیں، بلوچستان میں ملک دشمن عناصر کی سازشیں ناکام بنائیں گے۔

آرمی چیف نے مادروطن کا دفاع کرنے والے شہدا کو خراج تحسین پیش کیا۔

ترجمان پاک فوج کا کہنا ہے کہ آرمی چیف نے پنجگور کے قبائلی عمائدین سے بھی ملاقات کی، آرمی چیف نے دہشتگردی کیخلاف جنگ میں عمائدین کے کردار کو سراہا۔