کراچی سمیت سندھ بھر میں سی این جی اسٹیشنز ڈھائی ماہ بعد دوبارہ کھول دیئے گئے ہیں۔

سوئی سدرن گیس کمپنی کی ہدایات کی روشنی میں کراچی سمیت سندھ بھر میں سی این جی اسٹیشنز دوبارہ فعال ہوگئے ہیں۔

ایس ایس جی سی کے مطابق آج صبح 8 بجے سے صرف آر ایل این جی پر چلنے والے سی این جی اسٹیشنز دوبارہ فعال ہوئے ہیں۔

سی این جی اسٹیشنز کھلنے کے بعد پبلک ٹرانسپورٹ اور کمرشل گاڑیوں کی لمبی لمبی قطاریں اسٹیشنز پر دیکھی گئی ہیں۔

ملک میں گیس کے بحران کو مد نظر رکھتے ہوئے حکومت نے لوڈ مینجمنٹ پلان تیار کیا تھا جس کے تحت یکم دسمبر 2021 سے 15 فروری 2022 تک سی این جی سیکٹر کو گیس کی فراہمی معطل کردی گئی تھی۔

سی این جی اسٹیشن کھلنے سے جہاں ٹرانسپورٹ کے شعبے کو ریلیف ملا ہے وہیں ہزاروں افراد کے روزگار بھی بحال ہوئے ہیں۔

رواں موسم سرما میں پاکستان کے عوام کو بالحصوص اور کراچی کو نالخصوص گیس کے شدید بحران کا سامنا کرنا پڑا ہے۔

سردیوں کی شدت میں کمی کے باوجود کراچی کے بیشتر رہائشی علاقوں میں بدستور گیس کا بحران جاری ہے۔جس کی وجہ سے شہری روزمرہ معمولات کے لئے گیس سیلنڈر استعمال کرنے پر مجبور ہیں۔

دوسری جانب کراچی کے کئی صنعتکاروں کا کہنا ہے کہ گیس کے بحران کے باعث ان کے برآمدی آرڈر وقت پر پورے نہیں ہوپائے جس کی وجہ سے ناصرف انہیں بلکہ پاکستان کو بھی بھاری زرمبادلہ کا نقصان ہوا ہے۔

گیس بحران شدید ہونے پر کراچی کے صنعتکاروں میں احتجاج بھی کیا تھا۔

واضح رہے کہ خیبر پختونخوا میں ہائی کورٹ کے حکم پر 17 جنوری سے ہی سی این جی اسٹیشن ہفتے میں 3 روز کے لیے کھل چکے ہیں