صوبائی وزیر صنعت و تجارت میاں اسلم اقبال نے کہا ہے کہ غریب طبقات کا معیار زندگی بہتر بنانا ہمارا مقصد ہے۔

میاں اسلم اقبال نے لاہور سبزہ زار میں پارک کا افتتاح کیا اور کہا کہ صوبائی حلقہ 151کے تمام پارکوں کو اپ گریڈ کیا جارہا ہے۔

اسلم اقبال نے کہا کہ پارکوں میں تفریحی سہولیات کی بہتری پر کروڑوں روپے صرف کیے جا رہے ہیں، اقتدار ہماری منزل نہیں، غریب طبقات کا معیار زندگی بہتر بنانا ہمارا مقصد ہے۔

انکا کہنا ہے کہ اپوزیشن میں بیٹھ کر پنجاب کے عوام کا کیس لڑا، اقتدار میں آکر عوام کو ان کا حق لوٹا رہے ہیں، ہم ووٹ لینے کے بعد گھروں میں نہیں بیٹھے، وعدوں کی تکمیل کے لئے میدان عمل میں ہیں۔

اسلم اقبال نے کہا کہ صحت کا نظام برباد کرنے والے اپنے علاج کیلئے لندن جا بیٹھے، کاش یہ کوئی ایسا اسپتال بنا لیتے جہاں ان کا علاج ہوسکتا۔

صوبائی وزیر نے کہا کہ سرکاری خزانے سے جیبوں میں نوٹ آنا بند ہوئے تو معشیت کی خرابی کی باتیں کرنے لگے، ملک کی معشیت مضبوط لیکن لٹیروں کی معشیت برباد ہوئی ہے۔

وزیر صنعت اسلم اقبال نے کہا کہ ایک دوسرے کو چور کہنے اور سڑکوں پر گھسیٹنے کے دعوے دار اپنی چوری چھپانے کیلئے اکھٹے ہورہے ہیں، ن لیگ اور پیپلز پارٹی فیملی لمیٹڈ کمپنیاں بن چکی ہیں۔

انہوں نے مزید کہا کہ عمران خان کی دیانت دار قیادت کے ہوتے ہوئے اب ان کا جگاڑ نہیں لگے گا، عوام کی لوٹی ہوئی دولت انہیں واپس کرنا ہی ہوگی۔

واضح رہے کہ عوام نے پی پی 151 میں ریکارڈ ترقیاتی کام کروانے پر صوبائی وزیر میاں اسلم اقبال سے اظہار تشکر کیا۔