صوبائی دارلاحکومت لاہور میں  خصوصی کرتب کیلئے یوکرین سے لائی گئی 4 نایاب ڈولفن ہلاک ہوئی ہیں۔

تفصیلات کے مطابق لاہور میں ڈولفن شو کیلئے لائی جانے والی نایاب نسل کی 4ڈولفن مچھلیوں کی ہلاکت کاانکشاف ہوا ہے۔

کراچی میں ڈولفن شو کروانے والی نجی کمپنی نے روس اوریوکرائن کی دو کمپنیوں کے ساتھ معاہدہ کرکے2019 میں ڈولفن شو کیلئے 4 ڈولفن مچھلیاں جن میں 2نراور2مادہ تھیں امپورٹ کی تھیں جبکہ 2 سی کیٹ بھی منگوائی گئی تھیں۔

ڈولفن مچھلیاں 2019 میں شو کیلئے لاہورلائی گئی تھیں جبکہ زندہ بچ جانیوالی 2 سی کیٹ مچھلیاں چند روزقبل واپس یوکرین بھیج دی گئی ۔

لاہورمیں ڈولفن شوصرف 3ماہ ہی چل سکا اس کے بعد کورونا وبا کی وجہ منتظمین کویہ شوبند کرنا پڑا تھا۔

 کورونا کے دوران منتظمین ڈولفن مچھلیوں کو روزانہ خوراک تودیتے رہے ، ان کی دیکھ بھال کیلئے غیر ملکی ڈاکٹر بھی موجود تھا، لیکن اس کے باوجود چاروں ڈولفن یکے بعد دیگرے دم توڑ گئیں۔

ماہرین کے مطابق ڈولفن ایک ہائپرسوشل جانور ہے بعض اوقات اس کی ساری زندگی اپنے کسی ایک ساتھی کے کھوجانے یااس کی موت کے سوگ میں گزرجاتی ہے۔

ماہرین کا کہنا ہے ڈولفن شومیں ایسی ڈولفن استعمال کی جاتی ہیں جنہیں سمندر یعنی ان کے قدرتی مسکن سے پکڑا جاتا ہے کیونکہ اس وقت دنیا میں ڈولفن کی مصنوعی بریڈنگ کا کوئی بڑامرکزنہیں ہے، یہ عمل ان کی آبادی میں تیزی سے کمی کاباعث بن رہا ہے۔