پاکستان سپر لیگ میں پشاور زلمی اور کوئٹہ گلیڈی ایٹرز کے مابین میچ کے دوران عثمان قادر نے شاندار بالنگ کا مظاہرہ کیا۔

عثمان قادر نے پشاور زلمی کی جانب سے میچ میں 3 اہم وکٹ لی اور ہدف کے تعاقب میں گامزن کوئٹہ گلیڈی ایٹرز کی پیش قدمی کو روکنے میں اہم کردار ادا کیا۔

ماضی کے لیجنڈ، گگلی کے تخلیق کار اور مایہ ناز لیگ اسپنر عبدالقادر کے بیٹے عثمان قادر نے میچ میں کوئٹہ گلیڈی ایٹرز کے تین اہم بیٹرز کو اپنی چکمہ دیتی بالنگ سے پویلین واپس بھیجا۔

عثمان قادر نے عمر اکمل ، افتخار احمد اور جیمز وینسے کو میدان بدر کیا۔

عثمان قادر نے عمر اکمل کی وکٹ لینے کے بعد اپنی جیب سے ایک پرچی نکال کر ہوا میں لہرائی، جس پر پشاور زلمی کے تمام کھلاڑی بھی ششدر رہ گئے۔

سب کھلاڑی یہ جاننے کے لئے بے تاب تھے کہ اس پرچی پر کیا لکھا ہے، عثمان قادر نے شعیب ملک کے اشارے پر پرچی کو واپس اپنی جیب میں رکھ لیا.

سب کھلاڑی یہی سمجھ رہے تھے کہ اس پرچی پر عمر اکمل کے لئے کوئی جملہ لکھا گیا ہے۔

عثمان قادر نے میچ کے اختتام پر میڈیا سے گفتگو کرتے ہوئے عثمان قادر نے بتایا کہ پرچے پر لکھا تھا کہ،’اللہ سب سے بڑا تدبیروالا ہے‘۔

عثمان قادر نے وہی پرچہ دوبارہ نکال کر دکھاتے ہوئے کہا کہ کیمرے نے ٹھیک سے پرچی کو فوکس نہیں کیا اس لئے لوگ اس پر لکھے ہوئے جملے کے بارے میں شش وپنچ میں مبتلا تھے۔