کھٹمنڈو: نیپال میں یورینیم نما مادہ رکھنے کے الزام میں 2 بھارتیوں سمیت 8 گرفتار کو گرفتار کرلیا گیا ہے۔

کشمیرمیڈیا سروس کی رپورٹ کے مطابق نیپال میں 2 بھارتیوں سمیت 8 افراد کو گرفتار کیا گیا ہے جن پر یورنیم نما مادہ رکھنے کا الزام ہے۔

نیپالی پولیس کے مطابق اس مادے کو نیپال میں غیر قانونی طور پر فروخت کرنے کے لیے بھارت سے لایا گیا تھا۔

پولیس کا کہنا ہے کہ ایک خفیہ اطلاع کی بنیاد پر پولیس افسران کی ایک ٹیم نے کھٹمنڈو کے مضافات بدھا کے مقام پر ایک فائیو اسٹار ہوٹل کی پارکنگ میں کھڑی ایک کار سے یہ مادے برآمد کیا گیا ہے۔

پولیس کا کہنا تھا کہ کار سے آٹھ افراد کو گرفتار کیا گیا ہے جن میں دو بھارتی بھی شامل ہیں جن کی شناخت اوپیندر کمار مشرا اور راجو ٹھاکر کے نام سے ہوئی ہے۔

پولیس کا اپنے بیان میں کہنا تھا کہ دونوں بھارتی افراد کا تعلق بہار سے ہے جبکہ گرفتار ہونے والے دیگر 6 افراد کا تعلق نیپال ہی سے ہے۔

یہ گرفتاریاں اس وقت کی گئیں ہیں جب وہ یہ قیمتی مادہ 350 ملین روپے فی کلو فروخت کرنے کی تیاری کررہے تھے۔

رپورٹ کے مطابق پولیس نے بھوپیندر اور نوراج کو کھڑی کار سے گرفتار کیا جس میں یہ مادہ چھپایا گیا تھا اور ان کی طرف سے دی گئی معلومات کی بنیاد پر دیگر 6 افراد کو گرفتار کیا گیا ہے۔

رپورٹ میں کہا گیا ہے کہ پولیس نے ان کے پاس سے نو موبائل فون بھی ضبط کیے ہیں۔

واضح رہے کہ گذشتہ برس مارچ میں ڈھائی کلو غیر پروسیس شدہ یورینیم رکھنے کے الزام میں نیپال سے چار شہریوں کو بھی گرفتار کیا گیا تھا۔

گرفتار ہونے والوں ملزم میں سے ایک کا کہنا تھا کہ اس کا سسر یورینیم کو بھارت سے لایا تھا جبکہ اس کا سسر تقریباً 20 سال قبل یورینیم کی کان میں کام کیا کرتا تھا۔