آفاق احمد نے کہا ہے کہ حکومت عوام کو مہنگائی میں دبا کر کچل رہی ہے۔

مہاجر قومی موومنٹ کے سربراہ آفاق احمد نے پریس کانفرنس کرتے ہوئے کہا کہ یکم مارچ سے جنوبی سندھ صوبے کی حمایت میں دستخطی مہم کا آغاز کرنا تھا، پر اب ہم مارچ کو دستخط مہم موخر کر رہے ہیں۔

آفاق احمد کا کہنا تھا کہ 26 فروری بہت بڑا خواتین کا اجتماع کراچی گلشن اقبال میں ہو گا جس کے بعد سندھ کے مختلف اضلاع میں بڑے جلسے کیے جائیں گے۔

ان کا کہنا تھا کہ مہاجروں کے مسائل کا حل علیحدہ صوبے کی صورت میں نظر آرہا ہے۔ جب حکومت چاہتی ہے پٹرول، بجلی کی قیمت میں اضافہ کر دیتی ہے، یہ سب اس حاکم کی حاکمیت میں ہو رہا ہے جو ریاست مدینہ کی بات کرتا ہے۔

انہوں نے کہا کہ میں اگر اپنی قوم کو متحد کرنے کی بات کروں تو کہا جاتا ہے کہ لسانیت کی بات کی جاتی ہے۔

آفاق احمد کا کہنا تھا کہ مجھے پختونوں کے حوالے سے دیے گئے بیان پر تنقید کا نشانہ بنایا گیا، میں واضح کرنا چاہتا ہوں کہ میں اپنا بیان کسی صورت واپس نہیں لوں گا۔ میں نے کھبی قومی دھارے کی سیاست کی ہی نہیں، میں نے تو ہمیشہ لسانی سیاست کی ہے۔

انہوں نے یہ بھی کہا کہ پختون میرے بھائی ہیں، جو چیز ان کی وہ ان کی۔ جو چیز ہماری وہ سب کی۔

ان کا کہنا تھا کہ یہ شہر ویران اور غیر آباد تھا، ہم نے ہمیشہ سب کو ویلکم کیا، اس شہر میں لگتا ہے کہ قانون بس میرے لیے ہی ہے۔