گورنر سندھ عمران اسماعیل نے کہا ہے کہ پیپلزپارٹی لانگ مارچ کی تیاری کے بجائے سندھ کے حالات بہتربنانے پر توجہ دے۔

گور نر عمران اسماعیل سے ترجمان پنجاب حکومت حسان خاور کی گورنرہاؤس کراچی میں ملاقات ہوئی جس میں ملکی سیاسی صورتحال اور باہمی دلچسپی کے امورپر تبادلہ خیال کیا گیا۔

گورنرہاؤس کراچی میں ہونے والی ملاقات میں گورنر سندھ اور ترجمان پنجاب حکومت نے کراچی میں امن و امان کی صورتحال پراظہار تشویش بھی کیا۔

گورنر عمران اسماعیل نے ملاقات میں گفتگو کرتے ہوئے کہا کہ سندھ حکومت امن و امان بہتر بنانے کے لئے اقدامات کرے۔

انہوں نے کہا کہ پیپلزپارٹی لانگ مارچ کی تیاری کی بجائے سندھ کے حالات بہتربنانے پرتوجہ دے، افسوس ہے کہ اپوزیشن صرف سیاسی انتشار پھیلانے پریقین رکھتی ہے۔

دوسری جانب حسان خاور نے کہا کہ صحافی کے قتل پر تشویش ہے، سندھ میں امن و امان کی صورتحال پریشان کن ہے۔

انہوں نے کہا کہ اپوزیشن کی سیاست کا کوئی مستقبل ہے نہ ہی عدم اعتماد کی تحریک کا، پیپلزپارٹی کراچی کو پبلک ٹرانسپورٹ تک نہ دے سکی جبکہ تحریک انصاف نے کراچی کے عوام کو گرین لائن بس کا تحفہ دیا۔

پنجاب حکومت کے ترجمان نے مزید کہا کہ آج اربوں روپے کی لاگت سے وفاقی حکومت کے منصوبے میں کراچی میں زیر تعمیر ہیں۔