یوٹیوب نے اپنے پلیٹ فارم سے گمراہ کن ویڈیوز سے نمٹنے کے لیے اقدامات پر غور شروع کر دیا۔

چیف پروڈکٹ آفیسر نیل موہن نے ایک بلاگ پوسٹ میں کہا کہ پلیٹ فارم سے گمراہ کن معلومات کے پھیلاؤ سے نمٹنے کے لیے اقدامات تکمیل کے مراحل میں ہیں۔

انہوں نے کہا کہ تین بڑے مسائل تھے جن پر توجہ کی ضرورت تھی: گمراہ کن معلومات کو پھیلنے سے پہلے پکڑنا، متعدد پلیٹ فارم پر معلومات کا شیئر یا جانا اور اس پھیلاؤ کو صرف انگریزی زبان نہیں بلکہ دنیا بھر کی زبانوں میں روکنا۔

جنوری میں دنیا بھر کے 80 فیکٹ چکرز گروپس نے کہا کہ یوٹیوب گمراہ کن معلومات کو روکنے کے لیے کافی اقدامات نہیں کر رہا۔

کمپنی کو ارسال ہونے والے دستخط شدہ خط میں یہ نتیجہ اخذ کیا گیا کہ یوٹیوب نے اس معاملے میں جو کچھ بھی کیا وہ ناکافی تھا۔

خط میں مزید کہا گیا کہ یوٹیوب، دیگر لوگوں کو گمراہ اور ان کا استحصال کرنے، خود کو منظم کرنے اور اپنے لیے پیسہ جمع کرنے والے مکار لوگوں کا آلہ کار بن رہا ہے۔

خط میں مزید کہا گیا کہ ہم آپ پر زور دیتے ہیں غلط اور گمراہ کن معلومات کے خلاف مؤثر اقدامات کیے جائیں۔

یوٹیوب کا کہنا تھا کہ اس مسئلے کے حل کے لیے کمپنی اپنے سسٹمز کی مسلسل نئے ڈیٹا پر ٹریننگ کر رہی ہے۔