آئی جی پنجاب راؤ سردار علی خان نے پتنگ بازی اور ہوائی فائرنگ پر سخت کریک ڈاؤن کا حکم دے دیا ہے۔

آئی جی پنجاب کا کہنا ہے کہ ضلعی انتظامیہ، سول سوسائٹی اور والدین کے ساتھ مل کر خونی کھیل کے خلاف مؤثر مہم چلائی جائے۔

راؤ سردار علی نے کہا کہ دھاتی ڈور، پتنگیں بنانے اور اسکی خریدوفروخت خصوصاً آن لائن کاروبار میں ملوث افراد کو قانون کی گرفت میں لایا جائے۔

انہوں نے کہا کہ رات کے وقت خصوصی ٹیمیں تشکیل دیں اور مساجد میں اعلانات بھی کروائے جائیں، سپروائزی افسران خود پتنگ بازی اور ہوائی فائرنگ کے خلاف کریک ڈاؤن کی نگرانی کریں۔

آئی جی پنجاب نے راولپنڈی، لاہور، گوجرانوالا،  فیصل آباد، ملتان سمیت دیگر بڑے شہروں میں پتنگ بازی اور ہوائی فائرنگ کے خلاف خصوصی آپریشن کا حکم دیا ہے۔

راؤ سردار نے مزید کہا کہ والدین اپنے بچوں کی سرگرمیوں پر نظر رکھیں اور غیر قانونی کاموں کا حصہ نہ بننے دیں، شہری پتنگ بازی اور ہوائی فائرنگ کرنے والوں کی فوری 15پر اطلاع کریں۔

ترجمان پنجاب پولیس کا کہنا ہے کہ راولپنڈی میں پتنگ بازی اور ہوائی فائرنگ کرنے پر گزشتہ 24 گھنٹوں میں 323 افراد کو گرفتار کیا گیا۔

پنجاب پولیس کے ترجمان نے بتایا کہ رواں سال راولپنڈی ریجن میں پتنگ بازی اور ہوائی فائرنگ کرنے پر اب تک 1000 سے زائد مقدمات درج جبکہ 1120 افراد گرفتار کیے جا چکے ہیں۔

انہوں نے بتایا کہ لاہور میں پتنگ بازی کے 265مقدمات درج، 268 افراد گرفتار اور ہوائی فائرنگ کے 271مقدمات درج کر کے 262افراد گرفتار کیے گئے۔

ترجمان پنجاب پولیس کا مزید کہنا ہے کہ رواں سال اب تک مجموعی طور پر پتنگ بازی اور ہوائی فائرنگ کرنے والوں کے خلاف 2600مقدمات درج جبکہ 2700 افراد گرفتار کیے گئے۔