صوبائی وزیر تعلیم پنجاب مراد راس کا کہنا ہے کہ ماضی میں کسی بھی حکومت کی جانب سے ٹرانسجینڈر طبقے کی تعلیم و تربیت پر کوئی توجہ نہیں دی گئی ہے۔

تفصیلات کے مطابق صوبائی وزیر تعلیم پنجاب مراد راس کی فیشن ڈیزائنرز و معروف شوبز شخصیت حسن شہریار یاسین ایچ ایس وائے سے اہم ملاقات ہوئی ہیں۔

ملاقات اسکول کھانہ پروگرام، ٹرانس ایجوکیشن، اور طلبا کو فنی تربیت فراہم کرنے کے فروغ کے حوالے منعقد کی گئی۔

صوبائی وزیر تعلیم پنجاب مراد راس نے کہا کہ  ایچ ایس وائے نے تمام زیر گفتگو منصوبوں کے فروغ کے لئے ہر ممکن تعاون کی یقین دہانی کرائی ہے۔

 مراد راس کا کہنا تھا کہ ملتان میں کامیابی سے انعقاد کے بعد بہت جلد لاہور میں ٹرانسجینڈرز کے لئے اسکول کھولنے جا رہے ہیں، ماضی میں کسی بھی حکومت کی جانب سے ٹرانسجینڈر طبقے کی تعلیم و تربیت پر کوئی توجہ نہیں دی گئی ہے۔

صوبائی وزیر تعلیم نے کہا کہ اسکول کھانہ پروگرام پبلک پرائیویٹ پارٹنرشپ کے تحت چلایا جا رہا ہے،ہماری بھرپور کوشش ہے کہ معاشرے کے مخیر حضرات ہمارے بچوں کی بہتر نشوونما کے لیے اسکول کھانہ پروگرام میں بڑھ چڑھ کر حصہ لیں۔

انہوں نے کہا کہ جن اسکولوں میں ا سکول کھانہ پروگرام کا انعقاد کیا جا رہا ہے وہاں طلبا کی حاضری میں 33 فیصد تک اضافہ دیکھنے میں آیا ہے۔

انہوں نے مزید کہا کہ  اسکول کھانہ پروگرام کو صوبے بھر کے تمام پرائمری اسکولوں تک لے جانے کے لئے کام کر رہے ہیں۔