سیکرٹری اطلاعات پاکستان پیپلز پارٹی وسطیٰ پنجاب شہزاد سعید چیمہ نے کہا ہے کہ حکومت نے قومی اداروں کو بھی سیاسی آلودگی کا شکار بنادیا ہے۔

شہزاد سعید چیمہ نے اپنے بیان میں کہا کہ زبان بندی سے نظر بندی تک، تمام حکومتی حربے ناکام ہونگے۔

انہوں نے کہا کہ پیکا قانون نیازی کیلئے کلنک کا ٹیکہ ثابت ہو گا، حکومت نے قومی اداروں کو بھی سیاسی آلودگی کا بنادیا ہے۔

پی پی شہزاد سعید چیمہ نے کہا کہ آرڈیننسوں کی بیساکھیوں پر کھڑی حکومت گرنے والی ہے، چار درباری وزراء کے بیانات پر عوام انہیں روزانہ چار حرف بھیجتے ہیں۔

سیکرٹری اطلاعات نے مزید کہا کہ نالائقوں کے ٹولے نے صحافت، سیاست، معیشت اور معاشرت کو پرا گندہ کر دیا ہے، لانگ مارچ اور عدم اعتماد حکومتی تابوت میں آخری کیل ثابت ہونگے۔

پاکستان پیپلز پارٹی کو لانگ مارچ کی اجازت مل گئی

کمشنر کراچی نے پاکستان پیپلز پارٹی کو لانگ مارچ کی اجازت دے دی، کمشنر کراچی کو پیپلز پارٹی رہنما وقار مہدی نے درخواست دی تھی۔

اجازت نامے کے مطابق ضلعی پولیس لانگ مارچ قافلے کو سیکورٹی فراہم کرے گی، لانگ مارچ منتظمین ٹریفک کی روانی معمول کے مطابق جاری رکھنے کے پابند ہونگے۔

اجازت نامے میں کہا گیا تھا کہ لانگ مارچ کے دوران اسلحہ کی نمائش پر پابندی ہوگی، 27 فروری کو لانگ مارچ قافلہ مزار قائد سے نکلے گا۔

پیپلز پارٹی کا لانگ مارچ مزار قائد سے شاہراہ قائدین ہوتا ہوا شاہراہِ فیصل پہنچے گا اور لانگ مارچ کے دوران ٹریفک پولیس ٹریفک کنٹرول کے لئے موجود رہے گی۔