پنجاب کے محکمہ انہار میں گھوسٹ ملازمین کی بھرتیاں کرنے کا انکشاف ہوا ہے۔

تفصیلات کے مطابق محکمہ انہار کے ہیڈ کلرک کو جعلی بھرتیوں پر گرفتار کر لیا گیا ہے اور اینٹی کرپشن نے گرفتاری کی تصدیق کردی ہے۔

محکمہ انہار فیصل آباد کے ہیڈ کلرک طاہر محمود نے بیلداروں کی جعلی بھرتیاں کیں جس کے باعث ملزم نے قومی خزانہ کو 60لاکھ روپے کا نقصان پہنچایا۔

طاہر محمود نے 10 سال قبل شیخوپورہ کو رولز کے خلاف فلڈ زون ظاہر کرکے 15 بیلدار بھرتی کروائے۔

انہوں نے بتایا کہ بیلداروں کو 80دن کیلئے بھرتی کیا گیا لیکن ملزم جعلسازی سے 10سال تک انکی تنخواہ حاصل کرتا رہا، ملزم نے گھوسٹ ملازمین کی تنخواہیں وصول کرکے 60 لاکھ روپے کی کرپشن کی۔

سرکل آفیسر اینٹی کرپشن فیصل آباد نے ملزم طاہر محمود کو شیخوپورہ سے گرفتار کیا ہے۔ ملزم کے خلاف تعزیرات پاکستان کی مختلف دفعات کے تحت تھانہ اینٹی کرپشن فیصل آباد میں مقدمہ 22/08 درج ہے۔

اینٹی کرپشن نے اپنے محکمہ میں چھپی کالی بھیڑوں کے خلاف آپریشن کیا اور پولیس کانسٹیبل کو گرفتار کر لیا۔

اینٹی کرپشن پنجاب کے ترجمان نے بتایا کہ پولیس کانسٹیبل غلام عباس اینٹی کرپشن فیصل آباد میں تعینات ہے، ملزم کو مقدمہ نمبر 22/11میں رشوت لینے پر گرفتار کیا گیا۔