لاہور چیمبر کے تجارتی وفد نے دورہ ایران کے دوران پاک ایران تجارت کے فروغ میں گہری دلچسپی کا اظہار کیا ہے۔ اس موقع پر نمائندگان کا کہنا تھا کہ پاکستان اور ایران کے درمیان تجارت کے وسیع تر مواقع موجود ہیں۔

تفصیلات کے مطابق  ایرانی تاجروں نے لاہور چیمبر کے تیرہ رکنی تجارتی وفد، جس کی سربراہی لاہور چیمبر کے صدر میاں نعمان کبیر کررہے ہیں، سے ملاقاتوں کے دوران پاک ایران تجارت کے فروغ میں گہری دلچسپی ظاہر کی ہے۔

تجارتی وفد نے گذشتہ روز ایران کے بڑے کار ساز ادارے خدرو کارکمپلیکس، سلیمان کارپٹ انڈسٹریل پروڈکشن کمپنی،جے اے وائی آئل ریفائنری کا دورہ کیا۔

 اس موقع پر وفد نے اصفہان چیمبر آف کامرس اینڈ انڈسٹری کے نائب صدر بہرام سبحانی اور اصفہان کے میئر قاسم زادے سے ملاقاتیں کیں ۔لاہور چیمبر نے اصفہان چیمبر کے ساتھ مفاہمتی یادداشت پر دستخط بھی کیے۔

 ان اعلی سطحی ملاقاتوں کے دوران وفد کے سربراہ ،صدرلاہور چیمبرآف کامرس میاں نعمان کبیرنے پاکستان اور ایران میں تجارت اور سرمایہ کاری کے مواقع پر تفصیل سے گفتگو کرتے ہوئے کہا کہ ان شعبوں کی نشاندہی کی جن میں مشترکہ منصوبہ سازی ہوسکتی ہے۔ انہوں نے کہا کہ وفد کے دورہ ایران کا مقصد دونوں ممالک کے درمیان تجارت اور سرمایہ کاری کے تعلقات کو مزید فروغ دینا ہے۔

 لاہور چیمبر کے صدر نے مزید کہا کہ ان تمام عوامل پر قابو پایا جائے جو پاکستان اور ایران کے درمیان تجارت کے فروغ میں رکاوٹ ہیں۔ انہوں نے دونوں ممالک کے نجی شعبوں کے درمیان مضبوط تجارتی روابط کے فروغ کے لیے پاکستان اور ایران کے چیمبرز آف کامرس کے درمیان روابط کی مضبوطی پر زور دیا۔

صدرلاہور چیمبر  میاں نعمان کبیر نے کہا ہے کہ دونوں ممالک کے درمیان تعاون بڑھانے کے لیے دوطرفہ تجارت کے علاوہ نئی راہیں تلاش کرنے کی ضرورت ہے۔ پاکستان اور ایران جن ممکنہ شعبہ جات میں تجارت بڑھا سکتے ہیں ان میں ویلیو ایڈڈ ٹیکسٹائل، فارماسیوٹیکل اور چاول قابل ذکر ہیں ،دونوں ممالک کے درمیان توانائی کے شعبے میں مشترکہ منصوبے شروع کرنے کے بھی کافی امکانات موجود ہیں۔

A landmark trade agreement was signed today between Lahore Chamber of Commerce & Industry led by President, Mian Nauman Kabir, and Isfahan Chamber of Commerce, Industries, Mining and Agriculture (ICCIMA), represented by Vice President, Mr. Bahram Sobhani. pic.twitter.com/M3b9fYZ0E9

— The Lahore Chamber of Commerce & Industry Official (@LahoreChamber) February 23, 2022

 انہوں نے ایرانی ہم منصبوں کو بتایا کہ پاکستان اپنے بہت سے شعبوں میں غیرملکی سرمایہ کاری کی حوصلہ افزائی کررہا ہے، ایرانی سرمایہ کاروں کو بھی اس سے فائدہ اٹھانا چاہیے۔

میاں نعمان کبیر نے تجارت کے فروغ کے لیے مستقل بنیادوں پر تجارتی وفود کے تبادلے کی ضرورت پر زور دیتے ہوئے کہا کہ دونوں ممالک کے نجی شعبوں کے درمیان مشترکہ منصوبوں کو باہمی تجارت کے فروغ کے لیے بہت اہم قرار دیا۔

اس تناظر میں ایرانی ہم منصبوں نے لاہور چیمبر کے صدر میاں نعمان کبیر کی تجاویز سے اتفاق کرتے ہوئے کہا کہ دونوں ممالک کے نجی شعبوں کے درمیان قریبی روابط باہمی تجارتی اور اقتصادی تعلقات کو مزید مستحکم بنا سکتے ہیں۔