روس کے صدر ولادی میر پیوتن کی یوکرین کے مشرقی علاقوں میں فوجی کارروائیاں شروع کرنے کے بعد خطے کی صورت حال ہر لمحے تبدیل ہورہی ہے۔

یوکرائن کا 50 روسی فوجی ہلاک کرنے کا دعویٰ

یوکرائن نے دعویٰ کیا ہے کہ روسی فوج شمالی اور مشرقی یوکرائن میں داخل ہوگئی ہے جبکہ اُس کی فوجوں نے 50 روسی فوجی ہلاک کر دیے ہیں۔

’دوسری جنگ عظیم کے بعد یورپ میں جنگ کے ذمہ دار پیوتن‘

یورپی کمیشن کی سربراہ ارسلا وان در لیئن نے روس کے یوکرین پر حملے کی مذمت کرتے ہوئے کہا ہے کہ جنگ عظیم دوم کے بعد یورپ میں دوبارہ جنگ کے ذمہ دار روسی صدر ولادی میر پیوتن ہیں۔

امریکا اور روس کی کرنسی دباؤ کا شکار

غیر ملکی خبر ایجنسی کے مطابق روس کے یوکرین پر حملے کے بعد امریکی ڈالر کے مقابلے میں بڑی صنعتی ممالک کی کرنسی کی قدر میں اضافہ دیکھا گیا ہے جب کہ ایک روز کے دوران روس کی کرنسی روبل کے مقابلے میں امریکی ڈالر کی قدر میں 6 فیصد اضافہ دیکھا گیا ہے۔

بمباری سے 7 یوکرائنی شہری ہلاک

یوکرائن کی بارڈر گارڈ سروس کے مطابق روسی فوجیوں کے قافلے شمالی چرنیہیو اور سومی کے علاقوں اور مشرقی لوہانسک اور خارخیو کے علاقوں سے یوکرائن میں داخل ہو گئے ہیں۔

یوکرین کا روسی طیارے اور ہیلی کاپٹر تباہ کرنے کا دعویٰ

یوکرائن کی فوج نے روس کے 5 لڑاکا طیارے اور ہیلی کاپٹر مار گرانے کا دعویٰ کیا ہے جب کہ روس کی وزارتِ دفاع نے کسی لڑاکا طیارے یا ہیلی کاپٹر کے مار گرائے جانے کی تردید کی ہے۔

یوکرین کے دارالحکومت سے لوگوں کا انخلا

روس کی جانب سے حملوں کے بعد یوکرین کے دارالحکومت کیف سے ہزاروں لوگوں نے محفوظ مقامات کی جانب منتقل ہونا شروع کردیا ہے۔

پاکستان اسٹاک ایکسچینج میں شدید مندی

یوکرین پر روس کے حملے نے جہاں عالمی اسٹاک مارکیٹ پر بُرا اثر ڈالا ہے وہیں پاکستان اسٹاک ایکسچینج پر بھی 980 سے زائد پوائنٹس کی کمی ہوئی ہے۔

تیل کی قیمت 102 ڈالر فی بیرل سے تجاوز کرگئی

روس اور یوکرین کے درمیان فوجی تصادم نے جہاں عالمی امن کو تہہ و بالا کیا ہے وہیں اس کا اثر خام تیل کی قیمتوں پر بھی پڑا ہے۔ عالمی منڈی میں 7 سال بعد خام تیل کی قیمت 102 ڈالر فی بیرل کی ریکارڈ سطح سے تجاوز کرگئی ہے۔

روس کے فضائی حملوں کو پسپا کررہے ہیں، یوکرینی افواج

غیر ملکی خبر رساں ادارے کے مطابق یوکرین کی مسلح افواج نے ایک بیان شائع کیا ہے جس میں کہا گیا ہے کہ روسی فوج نے ملک کے مشرق میں اپنے یونٹوں پر شدید گولہ باری شروع کردی ہے۔

امریکا اور یورپی یونین کی روس پر پابندیاں

امریکا نے روس کے خلاف مالی پابندیوں کا اعلان کر دیا ہے، اس کے علاوہ یورپی یونین نے بھی روس کے خلاف اقتصادی پابندیوں کی منظوری دے دی ہے۔

روس نے خونریزی اور تباہی کا راستہ چنا، برطانیہ

روس کی جانب سے یوکرین کے مشرقی علاقے میں داخلے پر برطانوی وزیر اعظم بورس جانسن نے کہا ہے کہ روسی صدر ولادیمیر پیوٹن نے بلااشتعال حملہ کرکے خونریزی اور تباہی کا راستہ چنا ہے جبکہ اس حوالے سے یوکرینی صدر سے بات کی ہے کہ کس طرح جواب دیں۔

روسی حملے کا جواب فیصلہ کن انداز میں دیں گے، امریکا

امریکی صدر جو بائیڈن نے روس کی جانب سے یوکرائن پر حملے کو بلااشتعال اور بلاجواز قرار دیتے ہوئے کہا ہے کہ امریکا، اس کے اتحادی اور شراکت دار اس حملے کا ردِعمل متحد ہو کر فیصلہ کن انداز میں دیں گے، دنیا روس کو اس حملے کا جواب دہ ٹھہرائے گی۔

روس کا یوکرائن میں فوجی آپریشن کا اعلان

روسی صدر ولادیمیر پیوتن نے یوکرائن کے علاقے ڈونباس میں فوجی آپریشن کا اعلان کر دیا ہے۔ روس نے یوکرینی شہریوں پر حملے کرنے کی تردید کی ہے اور کہا کہ وہ فوجی تنصیبات اور فضائیہ کو جنگی ہتھیاروں سے نشانہ بنا رہا ہے۔

پاکستان کو روس سےمتعلق اپنے موقف سے آگاہ کردیا، امریکا

امریکی محکمہ خارجہ کے ترجمان نیڈ پرائس نے کہا ہے کہ امریکا وزیراعظم پاکستان کے دورہ روس سے باخبر ہے، امریکی حکومت نے پاکستان کو روس سے متعلق اپنے موقف سے آگاہ کردیا ہے۔